Георгий Марков – Болгарияда машҳур бўлган ёзувчи ва драматург, бир пайтлар ҳукумат раҳбари Тодор Живковнинг оиласига яқин инсон бўлган.

У катта нашриётларда ишлаган, маданият вазири бўлган Людмила Живкова билан дўст эди. Лекин Марков коммунистик режимни очиқ танқид қила бошлаганидан сўнг, ҳокимият билан муносабати бузилади.

1969 йили Италияга саёҳатга чиққан Марков Ватанга қайтмасликка қарор қилади. У Буюк Британияда яшай бошлаб, BBC, Deutsche Welle ва Radio Free Europe орқали Болгариядаги режимни қатъий танқид қила бошлайди. Ўз чиқишларида Тодор Живковни ҳам фош қилади.

1978 йил 7 сентябрь куни, Лондондаги Ватерлоо кўприги яқинида Марковнинг елкасига кимдир енгилгина туртиб ўтади. У буни оддий тўқнашув деб ўйлайди. Лекин орадан бир неча соат ўтгач, ҳарорати кўтарилади, аҳволи оғирлашади. Шифохонага ётқизилган Марков 4 кундан сўнг вафот этади.

Вақтинча тушунарсиз бўлиб турган ўлим сабаби кейинчалик патологоанатом томонидан аниқланади: Марковнинг оёғидан миллиметрдан кичик, кўзга кўринмас металл капсула топилади. Унинг ичида эса рицин — ўта кучли заҳар бўлган. Ушбу капсула соябоннинг махсус махфий механизми орқали отилган.

 Соябон – жомадонсимон қурол бўлиб, у ичидан пневматик (ҳаво босимида ишлайдиган) тугма орқали заҳарли пилюля “укол” сингари одам тери остига юбориладиган қилиб ишланган. Ҳеч ким шубҳа қилмайди, зарарланувчи эса оғриқни сезмаган бўлиши мумкин.

 Буюк Британия махсус хизматлари ва тарихчиларнинг фикрича, бу ишни болгар разведкаси ташкил қилган, СССР КГБси эса уларга техник ёрдам берган. Ўша кун, 7 сентябрь Болгария етакчиси Живковнинг туғилган куни бўлган. Баъзилар буни махсус “совға” деб баҳолайди.

1993 йилда КГБнинг собиқ генерали Олег Калугин ушбу операция ҳақида Скотленд-Ярдга маълумот берган. Лекин далиллар етарли бўлмагани боис иш судга етмаган. 2013 йилда иш муддати тугагани сабабли расман ёпилган.