Бухоро вилояти ИИБ ахборот хизмати раҳбари Улуғбек Шукурлаевнинг «Xabar.uz»га маълум қилишича, кейинги пайтларда ички ишлар органлари ходимлари томонидан ўтказилаётган кенг қамровли тезкор-профилактик тадбирлар ўз ҳовлисида, томорқасида ва дала шийпонида «каннабис» ўсимлигини етиштираётган кўпсонли шахсларнинг хатти-ҳаракатига чек қўймоқда.

Куни кеча дрон кузатуви орқали ўтказилган тадбирда Шофиркон тумани «Қайрағоч» маҳалласи, Арабхона қишлоғидаги бир хонадон томорқасида гиёҳванд модда турига кирувчи каннабис ўсимлиги парваришланаётгани аниқланган.

«Уйимиз  устидан учиб ўтаётган дрон «ишкал» чиқаришини олдиндан пайқаб қолганим учун ҳам зудлик билан томорқамдаги ўсимликларни узиб, уларни тандирда ёқиб ташлаш учун олов ёқдим. Аммо, улгуролмадим... айбимни тан оламан...», — дейди «каннабис»ни парваришлаб, етиштираётган аёл.

Маълум бўлишича, профилактика инспекторлари олинган хабар асосида дрон тасвирига тушган манзилга етиб боришгунча, аёл ўз қилмишларини «куйдириб» юбориш пайига тушган. Аммо, улгура олмаган.

Аввалига тезкорлик билан хатти-ҳаракатга киришган профилактика инспекторига ўз дарвозазини очишни истамаган ушбу фуқаро бир неча дақиқадан сўнг қонуний талабларга бўйсинишга мажбур бўлган.

Аёлнинг томорқасидан топилган ўсимликлар Бухоро вилоят ички ишлар бошқармаси эксперт криминалистика марказининг кимёвий экспертиза хулосасига кўра, «каннабис» экани исботланган ва ҳолат тегишли тартибда ҳужжатлаштирилган.

Айни пайтда ҳолат юзасидан Ўзбекистон Республикаси Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.