“ММФИ” Миллий тадқиқот ядро университетининг Тошкентдаги филиалида физика ва математика бўйича “Росатом” халқаро олимпиадасининг финал босқичлари бўлиб ўтди. Финалга Ўзбекистоннинг турли ҳудудлари ва яқин хориждан 34 нафар ўқувчи йўлланма олди. Саралаш босқичлари анъанавий ва масофавий шаклда ўтказилди.

Имтиҳон давомида иштирок этган оналардан бири Айгерим Қосимованинг таъкидлашича, олимпиадаларда иштирок этиш улар учун одатий ҳолатга айланган бўлса-да, ушбу мусобақа ечимлар кўплиги ва мантиқий ёндашув талаб қилиши билан ажралиб турди.

8-синф ўқувчиси Арслон Қосимов эса физика бўйича мазкур олимпиадада илк бор қатнашганини, топшириқлар формати унга танлов жараёнига янги нигоҳ билан қараш имконини берганини айтди:  

“Ташкилот жараёни менга ёқди. Бошқа давлатларда ҳам олимпиадаларда қатнашганман, аммо бу ерда муҳит анча қулай экан. Физика менга келажакда олий ўқув юртига киришим учун керак. Аэрокосмик соҳада ишлашни истайман. Олимпиадада қатнашиш борасида иккиланиб турганларга эса маслаҳатим: қатнашинг ва тайёрланинг, чунки сизнинг тайёрланишингиз учун ўтган йиллардаги топшириқларни бемалол очиқ манбалардан топиш имконияти мавдуд”.

Андижон шаҳридаги 1-сонли махсус мактабнинг 8-синф ўқувчиси Тимур Шокиржонов учун ушбу олимпиадада иштирок этиш аввал тўпланган тажрибанинг мантиқий давоми бўлди. Ўтган йили у финалгача етиб бориб, совринли ўринни эгаллаган эди. Бу сафар эса у ўз кучини яна бир бор синаб кўриш ва мураккаб масалаларни ечиш бўйича амалий кўникмаларини оширишга қарор қилди. Унинг айтишича, баъзан қийинчилик физиканинг ўзида эмас, балки масалаларнинг ифодаланиш тилида бўлади. Шу боис тайёргарлик жараёнида ўтган йиллар топшириқлари ва видео шарҳлар катта ёрдам беради.

Суҳбатлар давомида физика ва математикага қизиқишни шакллантиришда ўқитувчиларнинг ўрни алоҳида экани бир неча бор таъкидланди. ММФИ МТЯУ Тошкент филиали декани Насиба Нуржанованинг таъкидлашича, мактаб ўқувчилари, айниқса ўзлари қизиққан фан ўқитувчиларининг фикрини жуда юқори баҳолайди. Айрим ҳолларда бу фикр ҳатто ота-оналар қарашидан ҳам таъсирлироқ бўлиши мумкин. 

Тошкент шаҳридаги ММФИ МТЯУ филиали директор вазифасини бажарувчи Юрий Масловнинг сўзларига кўра, бундай тадбирлар абитуриентларни кенг қамраб олиш мақсадида мунтазам равишда ташкил этилади: “Биз шундай тадбирлар доирасида мактаб ўқувчилари ҳамда уларнинг ота-оналари учун экскурсиялар ўтказамиз. Яқин вақт ичида мактаб ва лицей битирувчи синф ўқувчилари учун яна бир халқаро муҳандислик-физика олимпиадасини ўтказишни режалаштиряпмиз. Ушбу олимпиаданинг ўзига хос жиҳати шундаки, ғолиб ва совриндорлар жорий йилги қабул жараёнида филиалимизга ўқишга киришда тўплаган баллари ҳисобга олинади. Ўтган йили бундай олимпиадада қарийб 1000 нафар ўқувчи иштирок этди. Барча мактаб ўқувчиларини олимпиадада қатнашишга таклиф этамиз. ”, — деди Юрий Маслов.

Маълумот ўрнида айтиш мумкинки, “Росатом” халқаро олимпиадаси 2025-2026 ўқув йили учун мактаб ўқувчилари олимпиадаларининг расмий рўйхатига киритилган. Физика бўйича у I даражага, математика бўйича эса II даражага эга. Бу эса ғолиб ва совриндорларга ихтисослик бўйича олийгоҳларга ўқишга киришда катта имтиёзлар беради. Улар ўз ютуқларидан бир неча йил давомида фойдаланиши мумкин.

Ўтган йили ММФИ МТЯУга қабул қилинган абитуриентларнинг қарийб учдан бир қисми олимпиадалар натижалари асосида ўқишга кирган. Бу эса мактаб ўқувчиларининг интеллектуал мусобақаларда иштирок этиши нафақат нуфузли, балки амалий жиҳатдан ҳам муҳим қадам эканини кўрсатади.

Бу йилги физика ва математика бўйича олимпиада финали натижалари 2026 йил апрель ойида эълон қилинади.

Зарифа Тожиева, журналист