АҚШнинг биринчи хоними Мелания Трамп ҳақида суратга олинган ҳужжатли фильм кинотеатрларда намойиш этилди.

Қарийб 36 миллион доллар миқдоридаги реклама бюджетига қарамай, Голливуд экспертлари уни катта молиявий муваффақиятсизлик кутаётганини айтган, ҳатто кино соҳасида «йилнинг энг омадсизи» дея баҳолашган эди.

104 дақиқа давом этадиган «Мелания» ҳужжатли фильмида 2025 йил январь ойида Дональд Трампнинг иккинчи марта президент сифатида инаугурация қилиниши олдидан ўтган 20 кун акс эттирилган. Фильм биринчи хоним ва унинг турмуш ўртоғи ўртасидаги муносабатларга яқин, шахсий нигоҳ сифатида тақдим этилмоқда.

Дональд Трамп фильмни фаол тарзда тарғиб қилмоқда. У аввалроқ, Truth Social ижтимоий тармоғида «бу фильмни албатта кўриш керак»лиги ва «чипталар жуда тез сотилиб кетаётган»и ҳақида ёзганди.

30 январдаги фильм тақдимотидан сўнг эса Трамп «Мелания» фильмини иккинчи марта ҳам кўрганини ва унга ёққанини ёзди.

«Унга баҳо беринг – албатта кўринг!» – деб ёзган у Truth Social ижтимоий тармоғида.