10 январдан эътиборан Туркия ҳукуматининг таълим грантлари дастури (Türkiye Bursları) бўйича ҳужжат қабул қилиш жараёни бошланди. Грант ғолиблари тураржой, ойлик стипендия, тиббий суғурта, бир марталик авиачипта билан таъминланади. Турк тилини ўрганиш истагида бўлган номзодлар эса бир йиллик курсда ўқийди.

Ўзбекистонлик иқтидорли ёшлар ҳам нуфузли университетларнинг бакалавриат, магистратура ва докторантура босқичида бепул таҳсил учун ҳужжат топшириши мумкин.

Ташкилотчиларга кўра, аризалар расмий сайт орқали 20 февралга қадар қабул қилинади.

Ҳар бир йўналиш бўйича талабгорнинг илмий натижалари ва академик салоҳияти кўриб чиқилади.

Грант дастурларида таҳсил бўйича ёш чеклови мавжуд. Бакалавриат учун – 21, магистратура учун – 30 ва докторантура учун эса 35 ёшдан ошмаган номзодлар ариза топшириши мумкин.

Туркия ҳукумати ўтган асрнинг 60-йилларида бошлаб икки томонлама битимларга кўра, муайян давлатлар талабаларига грантлар ажрата бошлаган. 1992 йилдан эса кенг миқёсда грантлар тақдим этилмоқда. Ҳукумат грантлар дастури 2012 йилдан буён «Türkiye Bursları» деб аталади. Хориждаги турклар ва қардош халқлар бошқармаси (YTB) мазкур стипендиялар дастурини мувофиқлаштириш билан шуғулланади.

2023 йилда 162 давлатдан 117 минг номзод «Türkiye Bursları» учун ҳужжат топширган. Ҳозирга қадар мазкур грант доирасида дунё бўйлаб 150 мингдан зиёд талаба Туркияда таҳсил олган.