Сербия президенти Александр Вучич Хорватия, Албания ва Косово ўртасидаги ҳарбий ҳамкорлик кучайишини ўз мамлакати хавфсизлигига таҳдид деб атади ва Белград эҳтимолий ҳужумни қайтаришга тайёрлигини маълум қилди.

Вучичга кўра, Хорватия, Албания ва Косово 2025 йил 18 мартда Тиранада имзоланган мудофаа соҳасидаги уч томонлама декларация асосида бирлашган. У ушбу ҳамкорлик фақат техник эмас, балки стратегик ҳужумкор характерга эга эканлигини даъво қилмоқда.

Бу иттифоқ Европадаги йирик можаро (Россия ва Европа ўртасида) ёки Яқин Шарқдаги инқироз кучайган пайтда, дунёда «тартибсизлик» юзага келганда ҳаракат бошлаши мумкин, деди Сербия раҳбари.

Вучич Сербия ихтиёрида 400 км масофагача учадиган Хитойнинг гипертовушли «ҳаво-ер» ракеталари мавжудлигини ва бу тизимлар ҳужумнинг олдини олувчи энг замонавий қуроллардан бири эканлигини таъкидлади.

Хорватия, Албания ва Косово расмийлари Александр Вучичнинг айбловларини кескин рад этди — ушбу уч томонлама ҳамкорлик ҳеч кимга, жумладан Сербияга қарши қаратилмаган. Келишувдан мақсад — киберҳужумларга қарши туриш, ҳарбий таълим ва кадрлар тайёрлаш ҳамда Косовонинг НАТО тузилмаларига интеграциялашувига кўмаклашишдир. Ўз навбатида, Албания мудофаа вазири Пирро Венгу 2026 йил январида Сербияни ҳам ушбу пактга қўшилишга таклиф қилганини, бироқ Белграддан жавоб бўлмаганини эслатиб ўтди.