5 июль, жума куни Эрон Ислом Республикасида ҳамда мамлакатнинг хорижий давлатларда очилган сайлов участкаларида президент сайловларининг иккинчи тури бўлиб ўтди.

Жумладан, Ўзбекистонда вақтинча яшаб турган эронликлар мамлакатнинг Тошкентдаги элчихонаси биносида очилган овоз бериш участкасига келиб, сайловларнинг иккинчи турига чиққан икки номзоддан бирига овоз беришди.

Эрон Ислом Республикаси конституциясига кўра президент сайловларининг биринчи турида сайловчиларнинг 50 фоизидан кўпроғининг овозини олган номзод мамлакат президентлигига сайланган ҳисобланади. Бордию номзодлардан бирортаси 50 фоиздан ортиқ овоз ололмаса, президент сайловларнинг энг кўп овоз олган икки номзод иштирокидаги иккинчи тури натижалари бўйича аниқланади.

Сайлов натижаси барча овозлар ҳисоблаб бўлингач, 6 июлда — куннинг биринчи ярмида маълум бўлади.

Президент лавозими учун собиқ соғлиқни сақлаш вазири Масъуд Пизишкиён (69 ёш) ва Эрон етакчисининг Миллий хавфсизлик бўйича олий кенгашдаги вакили, консерватор Саид Жалилий (58 ёш) курашмоқда.

28 июн куни ўтказилган сайловнинг биринчи турида Пизишкиён 44 фоиз, Жалилий 40 фоиз овоз тўплаганди.