Росариолик юлдуз Испания терма жамоасида ўйнаши мумкин эди, аммо биргина видеоёзув унинг тақдирини бутунлай ўзгартириб юборди.

Мессининг Аргентина терма жамоаси сафидаги афсонавий даври бугун – Беннинга қарши ўртоқлик ўйини билан ўз якунига етади. Лео аллақачон «албиселесте» тимсолига, аргентиналиклар ҳамда барча футбол мухлислари хотирасида абадий сақланиб қоладиган афсонага айланиб улгурди.

Лионель Андрес Месси Аргентинанинг Росарио шаҳрида туғилган. Бироқ агар у Испания терма жамоасида ўйнашни танлаганида, унинг тақдири бошқача кечиши ҳам мумкин эди. Бу илмий-фантастик тахмин эмас, балки оддий VHS видеокассетаси туфайли йўққа чиққан реал воқеа эди.

2003 йилнинг декабрь ойида 16 ёшли Лео Месси «Барселона»нинг ёшлар жамоаси (Juvenil A) ўйинчиси бўлиб, Портудаги ўртоқлик ўйинида асосий жамоа сафида эндигина дебют қилган эди. Унинг жамоадошлари (Пике, Сеск ва Виктор Васкес) мунтазам равишда Испания ёшлар терма жамоаларида тўп суришар ва уни ўз сафларига қўшилишга кўндиришарди.

Ёш Лео эса ўзини 100 фоиз аргентиналик ҳис қилар ва фақат ўз миллий жамоасида ўйнашни хоҳларди. Лекин муаммо шундаки, у 13 ёшидаёқ «Ньюэллс»ни тарк этгани боис ватанида уни ҳеч ким танимасди ва «Албиселесте»нинг ёшлар жамоаларига бирор марта ҳам чақирилмаган эди.

Шунда Леонинг отаси клуб матбуот хизмати ходимига мурожаат қилади: «Хайме, бизга Месси “Барселона”да ўйнаётган ва голлар ураётган кадрлар акс этган видео керак. Чунки уни ватанимизда ҳеч ким танимайди, сен эса у ким эканлигини уларга тушунтиришда ёрдам беришинг керак».

Хорхе Мессининг илтимоси бажарилади: Barça TV томонидан VHS кассетага ёш истеъдод эгасининг рейдлари ва голлари жамланган тўплам муҳрланади. Энди бу ёзувни Аргентина федерациясидаги масъул шахсларга етказиш қолган эди. Бу имконият 2003 йил 27 декабрда Аргентина терма жамоаси Каталонияга қарши ўртоқлик ўйини учун Барселонага келганида туғилди.

Аргентина терма жамоаси жойлашган «Princesa Sofía» меҳмонхонасида видеокассета ўша пайтдаги бош мураббий Марсело Бьелсанинг ёрдамчиси Нельсон Вивасга топширилади, у эса уни Бьелса билан бирга кўради.

Бьелса ўз кўзларига ишонмасди: «Видеони одатий тезликда қўй, бундай тезликда кўриб бўлмайди».

Вивас эса видео жойида эканини айтади. Гап шундаки, кичкина Леонинг ўта юқори тезлиги шундай тушунмовчилик келтириб чиқарган эди.

«У феномен, бу болага шунчалик тез ҳаракат қилишни ким ўргатган?» – Бьелса ҳайратини яшира олмайди.

Аргентина жамоаси ватанига қайтади ва Вивас видеокассетани Аргентинанинг 17 ёшгача бўлган ўсмирлар терма жамоаси мураббийи Уго Токаллига қуйидаги сўзлар билан топширади: «Бу ўйинчини бой берманг, аргентиналик ва футбол мухлиси сифатида сиздан ўтиниб сўрайман».

Дастлаб Токалли бунга унчалик эътибор қаратмайди ва Финляндияда бўлиб ўтадиган ўсмирлар ўртасидаги Жаҳон чемпионатига олиб кетиладиган таркибдан бирор футболчини чиқариб ташлашни истамайди.

Бироқ Финляндиядаги турнирнинг ярим финалида Испания Аргентинани мағлуб этади. Ҳар икки жамоа битта меҳмонхонада яшаган ва Испания жамоаси ошпази Токаллига мурожаат қилиб шундай деган эди: «Агар сизда “Барселона”да ўйнайдиган ўша йигит бўлганида, бу жамоа билан чемпион бўлардингиз...»

Токалли ундан Лео Мессини назарда тутяпсизми, деб сўрайди. Бунга жавобан ошпаз ҳайратда қолади: «Нима? Уни била туриб олиб келмадингизми?!»

Токалли шунчаки таркибни ўзгартиришни истамаган эди, аммо содир бўлган воқеалардан кейин у видеокассетадаги ёзувни қайта кўриб чиқади. Аргентинага қайтгач, Аргентина футбол ассоциацияси ходимига Леони жамоага жалб этиш учун унинг оиласи билан боғланишни буюради.

Бу вазифа Омар Соутога юкланганди. У Росариодаги барча Мессиларни қидириб, телефон китобини варақлайди. Қидирув пайтида у Лео исмининг қисқартмаси деб ўйлаб, дастлаб Леонардо исмли шахсларни суриштиради. Ниҳоят, Леонинг бувиси Селия, сўнгра тоғаси билан боғланади ва улар орқали футболчининг отаси Хорхе Мессини топади.

Ота телефон суҳбатида қувончдан ҳайқириб юборади: «Ҳа, у Лионель! Ниҳоят уни чақиришибди-да! Ўғлим Аргентина учун ўйнашни жуда ҳам хоҳлайди!»

Аргентина футбол ассоциацияси «Барселона»га терма жамоанинг расмий чақирув хатини юборади. Қизиғи, унда футболчининг исми «Леонель Меччи» деб хато ёзилган эди. Улар ҳатто унинг исмини қандай тўғри ёзишни ҳам билишмасди. Шу тариқа улар келажакда Аргентина ва жаҳон футболи тарихида Марадонанинг ворисига айланадиган улуғ ўйинчини миллий жамоага чақиришган эди.

2004 йил июнда 17 ёшли Месси Аргентинанинг 20 ёшгача бўлган ёшлар терма жамоаси сафида Парагвайга қарши баҳсда дебют қилади. Якунда унинг феноменал ўйинлари эвазига Аргентина ёшлар ўртасидаги Жаҳон чемпионатида зафар қучади. У финалда жамоасининг иккита голига ҳам муаллифлик қилади, турнир тўпурари ва энг яхши ўйинчиси бўлади.

Испания федерацияси ҳам бу ўсмирни «рохита» футболкасида кўришдан жуда манфаатдор эди, аммо Леонинг ўз ватанига садоқати ва оддий VHS видеокассетасининг ижобий таъсири унинг тақдирини бутун умрга «Албиселесте» билан боғлади.

Унинг голлари, совринлари ва қолдирган улкан мероси абадийдир. Аммо ўша кичик видеотасма ва Хорхе Мессининг ташаббуси бўлмаганида, футбол тарихи ҳозир бутунлай бошқача тарзда ёзилган бўлар эди.