«Ливерпуль» ҳимоячиси  Трент Александр-Арнольд  ёзда жамоадан кетишини расман эълон қилди

«Бу менинг ҳаётимдаги энг оғир қарор» – дейди Александр-Арнольд, ўзининг 20 йиллик «Ливерпуль» саёҳатини якунлаётганини тасдиқлар экан.

 «Кўплар нима учун ҳозиргача сукут сақлаганимни тушуна олмаган бўлса керак. Лекин мен доим жамоа манфаатини биринчи ўринга қўйдим — бу эса 20-чемпионликни таъминлаш эди».

«Бу клуб менинг бутун ҳаётим, бутун оламим бўлди. Академиядан тортиб ҳозиргача, клуб ичида ва ташқарисида менга бўлган меҳр ва қўллаб-қувватлаш ҳар доим ёдимда қолади».

«Мен ҳеч қачон бундан бошқа муҳитда бўлмаганман. Энди эса янги чорловга юз тутиш, ўзимни иш ва шахсий жиҳатдан янги жойда синовдан ўтказиш вақти келди».

«Ҳар бир кунимда бор кучимни клубга бағишладим. Умид қиламанки, сизлар ҳам менинг бу ердаги меҳнатимни ҳис қилдингиз».

«20 йил мобайнида мени қўллаб-қувватлаган барчага – мураббийлар, жамоадошлар, клуб ходимлари ва фантастик мухлисларга юрагимдан чуқур миннатдорчилик билдираман».

«Мен орзуларимни шу клубда рўёбга чиқардим. Сизлар билан бирга кечирган унутилмас лаҳзаларни ҳеч қачон қадрсиз қилмайман. Менинг бу клубга бўлган муҳаббатим ҳеч қачон сўнмайди», – дея футболчининг сўзларини келтиради Фабрицио Романо.

Маълумот учун, англиялик ҳимоячи «Ливерпуль» таркибида 351 ўйинда 26 гол уриб, 93 ассист қайд этган ва жамоа билан барча йирик титулларни қўлга киритган.