JerryRigEverything ники остида танилган блогер Зак Нелсон ўз синовлари асосида энг чидамли смартфонларни аниқлади. Махсус роликни ўзининг YouTube-каналида жойлаштирди.

Смартфонларнинг таъмирга яроқлилиги ва пухталигини ўрганишга ихтисослашган муаллифнинг айтишича, AGM H5 — корпуси энг пишиқ смартфон. Нелсон ўз тести давомида бу қурилмани қўлидаги воситалар ёрдамида синдира олмади.

Энг мўрт корпусли смартфон — осонгина иккига бўлинган Asus ROG Phone 6 Pro бўлди.

Энг таъмирбоп смартфон сифатида блогер Google Pixel 7 Pro ни ажратиб кўрсатди. Бу қурилманинг ички қисмига кириш осон, дисплейи ечилса кифоя.

Шунингдек, мутахассис орт қопқоғи тез очилувчи iPhone 14ни таъмирлаш осон қурилма, деди.

Энг мураккаб тузилишли қурилмалар — Samsung Galaxy Z Fold 4 ҳамда Galaxy Z Flip 4. Буклама смартфонларни таъмирлаш пайти синдириб қўйиш эҳтимоли катта, қолаверса эҳтиёт қисмлари қиммат. Samsung қурилмаларининг ташқи дисплейлари 500 доллар туради.

Конструкция томонлама энг инновацион қурилма сифатида блогер мураккаб ёруғлик индикацияси тизимига эга Nothing Phone 1 ни тилга олди.

Ички компонентлари мантиқан энг тўғри жойлашган қурилма эса — Google Pixel 7 Pro.