2026-yil 1-sentyabrdan O‘zbekistonda budjet tashkilotlari xodimlarining ish haqi va talabalar stipendiyalari 7 foizga oshiriladi. Shuningdek, mehnatga haq to‘lashning eng kam miqdori hamda bazaviy hisoblash miqdorining yangi qiymatlari kuchga kiradi.

Prezidentning 23-iyundagi farmoniga muvofiq:

• mehnatga haq to‘lashning eng kam miqdori 1 mln 271 ming so‘mdan 1 mln 360 ming so‘mga;
• Bazaviy hisoblash miqdori esa 412 ming so‘mdan 440 ming so‘mga yetkaziladi.

Bu 2026-yildagi ijtimoiy to‘lovlar va daromadlarni indeksatsiya qilishning ikkinchi bosqichi hisoblanadi. Avvalroq, 1-iyuldan pensiyalar, nafaqalar va Ijtimoiy reyestrga kiritilgan oilalarga beriladigan moddiy yordamlar ham 7 foizga oshirilgan.

Iyul oyidagi oshirishdan keyin eng kam yoshga doir pensiya 983 ming so‘m, nogironlik pensiyasining eng kam miqdori esa 1 mln 83 ming so‘m etib belgilangan.

Eslatib o‘tamiz, BHMning oshishi davlat bojlari, yig‘imlar, jarimalar va boshqa qator to‘lovlar miqdorining ham oshishiga olib keladi.