Dam olish kunlarida Bo‘stonliqdagi tog‘li hududlarda avtomobillar harakati «bir tomonlama» tashkil etiladi.

Bu haqda Toshkent viloyati IIBB YHXB «Bildirsoy» va «Chimyon» kabi dam olish joylariga boruvchi haydovchilarga ogohlantirish bilan chiqdi.

Qayd etilishicha, 4R6 «Toshkent-Chirchiq-Chimyon» avtomobil yo‘lining 57 kilometridan boshlab, mazkur yo‘lning 92 kilometrigacha, ya’ni, 4R10 avtomobil yo‘li bilan tutashgan joygacha transport vositalarining harakati «bir tomonlama» tashkil etiladi.

Harakat «bir tomonlama» tashkil etilgan yo‘lning boshida 5.5 (bir tomonlama harakatli yo‘l) va uning oxirida 5.6 (bir tomonlama harakatli yo‘lning oxiri) axborot ko‘rsatkich yo‘l belgilari, shuningdek, harakatlanib kirish taqiqlangan qismida 3.1 (kirish taqiqlangan) yo‘l belgisi o‘rnatiladi.

«Yusufxona» chorrahasida «bir tomonlama» harakat tugatiladi va avtomobillarga «ikki tomonlama» harakatlanishga ruxsat etiladi. «Yusufxona» chorrahasidan 4R10 avtomobil yo‘liga burilib, dam olish maskanlaridan ortga qaytish mumkin bo‘ladi.