Xizmatlar sohasining joylardagi «O‘zmilliybank» AJ ishtirokidagi rivojlanish jarayoni bilan Qashqadaryo viloyati misolida tanishish maqsadida, joriy yilning 6-7 may sanalarida OAV vakillari uchun press-tur tashkil etildi. 

Press-tur ishtirokchilari dastlab «O‘zmilliybank» AJ ning Qashqadaryo viloyati filiali faoliyati bilan tanishdblar.

«O‘zmilliybank» AJ Qashqadaryo viloyati filiali 1992 yil 3 avgustda tashkil topgan bo‘lib, shu kunga qadar Qashqadaryo viloyatining turli hududlarida faoliyat yuritib kelmoqda. Jumladan, Qarshi, G‘uzor, Shaxrisabz va Muborak tumanlarida bankning 4 ta filiali xizmat ko‘rsatib kelayotgan bo‘lsa, Nishon tumanida 1 ta Bank xizmatlari markazi (BXM) esa aholiga sifatli bank xizmatlarini taqdim etmoqda.

Mazkur filiallar va BXM tomonidan ajratilgan kreditlar hisobidan Qashqadaryo viloyatida katta maydonlarda intensiv bog‘lar, yirik sig‘imli zamonaviy muzlatgichlar, savdo va maishiy xizmat ko‘rsatish markazlari, umumiy ovqatlanish maskanlari tashkil topdi. 2021 yilda tarmoqlar bo‘yicha tahlil qilinganda:

• sanoat sohasida - 466,3 mlrd. so‘mlik 29 ta loyiha;
• qishloq xo‘jaligida – 354,3 mlrd. so‘mlik 17 ta loyiha;
• xizmat ko‘rsatishda - 109,2 mlrd. so‘m 139 ta loyihalar amalga oshirilgan.

Ushbu tadbirkorlik sub’yektlariga kredit mablag‘lari ajratilishi natijasida 2 296 ta yangi ish o‘rinlari yaratilgan.

Filialda jami 272,8 mingta mijozlarga xizmat ko‘rsatiladi. Shundan 257,1 mingtasi jismoniy shaxslar va 15,7 mingtasi yuridik shaxslar hisoblanadi. Jismoniy shaxslarning jami depozit qo‘yilmalari 59,5 mlrd. so‘mni tashkil etadi. To‘lov plastik kartochkalaridan foydalanishda qulayliklar yaratish maqsadida joylarda 18 ta bankomat, 18 ta infokioska, 1822 ta savdo terminallari dislokatsiya qilingan.

Bundan tashqari, aholiga valyuta amaliyotlarida qulayliklar yaratish maqsadida viloyat hududida 5 ta valyuta ayirboshlash shahobchasi va 24/7 rejimda xizmat ko‘rsatuvchi 3 ta avtomatlashtirilgan valyuta ayirboshlash shaxobchasi (bankomat) shahar va tuman fuqarolariga hamda tashrif buyurgan mehmonlarga xizmat ko‘rsatmoqda.

Bankning filialida zamonaviy innovatsion bank xizmatlari ko‘rsatilishiga alohida ahamiyat qaratilgan. Bank mijozlarining 54 foizi masofadan boshqariladigan bank xizmatlaridan foydalanmoqdalar. Bunda hisobraqamlarda bank aylanmalarini amalga oshirish, onlayn kredit rasmiylashtirish yoki kredit qarzdorligini qoplash, xalqaro va milliy plastik kartochkalarda xar qanday bank amaliyotlari hamda to‘lovlarni amalga oshirish, omonat rasmiylashtirish amaliyotlari, xorijiy valyutalarda konversion amaliyotlar, pul o‘tkazmalari kabi bank xizmatlaridan masofadan foydalanish mumkin.

Shuningdek, Qashqadaryo viloyati to‘qimachilik, tekstil mahsulotlari, sanoat mahsulotlari ishlab chiqarish hamda bog‘dorchilikka ixtisoslashgan bo‘lib, xususan bugungi kunda xizmat ko‘rsatish sohasi viloyatning asosiy drayveriga aylanib ulgurdi.

Bugungi kunda viloyat iqtisodiy ko‘rsatkichlarida xizmatlar sohasining ulushi ham jadal sur’atlarda oshib bormoqda. Mazkur yo‘nalishda viloyatda 21 mingdan ziyod korxona aynan servis sohasida faoliyat olib boryapti.

2021 yilda viloyatda xizmat ko‘rsatish hajmi 13,3 trln. so‘mni tashkil etib, o‘sish sur’ati 118,0 foizga yetgan. Bugun viloyatda 21 mingdan ziyod korxona aynan servis sohasida faoliyat olib borayotgan bo‘lsa, hududda yana 6 mingdan ziyod xizmat ko‘rsatish shoxobchalariga ehtiyoj mavjud.

Joriy 2022 yilning 1 chorak yakuni viloyatda xizmat ko‘rsatish hajmi 3 trln. 733 mlrd. so‘mni tashkil etib, o‘sish sur’ati 135,0 foizga yetgan hamda 17,4 mingta yangi ish o‘rinlari yaratilgan. Yil boshidan yangi tashkil etilgan xizmat ko‘rsatish korxonalari soni 3 628 tani tashkil etadi.

Joriy 2022 yilda viloyatda xizmat ko‘rsatish xajmini 19,9 trln. so‘mga yetkazish rejalashtirilgan bo‘lib, bunda 55 mingdan ziyod yangi ish o‘rni yaratilishi belgilangan.

Shundan so‘ng press-tur ishtirokchilari Shahrisabz tumanida joylashgan «Love City» MChJ faoliyati bilan tanishdilar. Aholiga sifatli fotoxizmatlarni taqdim etib kelayotgan mazkur maskan loyihasining umumiy qiymati 1,5 mlrd. so‘mni tashkil etsa, «O‘zmilliybank» AJ tomonidan Tiklanish va taraqqiyot jamg‘armasi mablag‘lari hisobidan 1 mlrd. so‘m kredit ajratildi. Bugungi kunda mazkur markazda 10 nafar fuqaro ish bilan ta’minlangan.

Bugun umumiy ovqatlanish bozori jadal rivojlanmoqda. Bu jarayonda, sifatli ovqatlanish xizmatlarini yo‘lga qo‘yish va uni tizimlashtirishdan asosiy maqsad insonlar salomatligini kafolatlovchi sog‘lom ovqatlanish muhitini yaratib berish hisoblanadi. Shahrisabz tumanidagi yana bir xizmat ko‘rsatish sohasida faoliyat yurtuvchi «Anhor Kesh» MChJ tomonidan «O‘zmilliybank» bilan hamkorlikda tashkil etilgan shinam va mo‘’jazgina tamaddixona zamoanviy uslubdagi dizayn va interer har qaysi mijoz e’tiborini tortishi tabiiy.

Mazkur loyihaning umumiy qiymati 2 mlrd. 872 mln. so‘mni tashkil qilsa, shundan “O‘zmilliybank” AJ tomonidan Tiklanish va taraqqiyot jamg‘armasi mablag‘lari hisobidan 2 mlrd. so‘m kredit ajratildi. Bugungi kunda mazkur maskanda 22 nafar fuqaro doimiy ish bilan ta’minlangan.

Press-turning ikkinchi kunida ishtirokchilar dastlab Qarshi shahrida joylashgan «Parizoda Oltin Yulduz» NTM faoliyati bilan yaqindan tanishdilar. Mazkur ta’lim markazining umumiy qiymati 500 mln. so‘mni tashkil qilsa, shundan 200 mln. so‘m Bank kreditidan foydalanilgan.

Ushbu o‘quv markazi kasbiy ta’limga ixtisoslashtirilgan bo‘lib, istovchilar qandolatchilik, tikuvchilik, sartaroshchilik kabi yo‘nalishlarda ta’lim olib kasbiy mahoratlarini oshirishlari mumkin.

Navbatdagi manzil Qarshi shaxrida joylashgan «Etalon Savdo Servis»  XK bo‘ldi. Mazkur korxona «O‘zmilliybank» AJ bilan hamkorlik qilgan holda bugungi kunda shahar aholisi va mehmonlarga xizmat qilib kelayotgan supermarket faoliyatini yo‘lga qo‘ygan.

Supermarket rastalarini oziq-ovqat, nooziq-ovqat, qishloq xo‘jaligi mahsulotlari hamda yaxna ichimliklar singari mahsulotlar bilan to‘ldirish uchun umumiy hisobda 4 mlrd. so‘m sarf qilingan bo‘lsa shundan mazkur korxonaga 2,5 mlrd. so‘m miqdoridagi kredit mablag‘i «O‘zmilliybank» AJ tomonidan ajratilgan.

Shundan so‘ng press-tur ishtirokchilari G‘uzor tumanida joylashgan «Sodiqbek Qahramon O‘g‘li» MChJ faoliyati bilan tanishdilar.

Bugungi kunda 5 nafar xodim faoliyat yuritayotgan G‘uzor tumanida joylashgan mazkur mo‘jazgina bolalar maydonchasi va madaniy dam olish maskani loyihasining umumiy qiymati 950 mln. so‘mni tashkil etsa, shundan 500 mln. so‘m Bank tomonidan ajratilgan kredit mablag‘iga to‘g‘ri keladi.

Press-tur doirasidagi navbatdagi manzil «Al Khorazmiy School» MChJ bo‘ldi.

Hozirda 3 nafar fuqaro ish bilan band bo‘lgan G‘uzor tumani «Obod» MFY manzilida joylashgan mazkur o‘quv markazi loyihasining umumiy qiymati 800 mln. so‘mni tashkil etadi. Shundan mijozning loyihadagi o‘z mablag‘i 300 mln. so‘mni tashkil etsa, «O‘zmilliybank» AJ tomonidan 500 mln. so‘m miqdoridagi kredit mablag‘i ajratilgan.