Prezidentning «Respublikada asalarichilik tarmog‘ini jadal rivojlantirish va asalarichilik faoliyatini yanada qo‘llab-quvvatlashga doir qo‘shimcha chora-tadbirlari to‘g‘risida»gi qarori loyihasi muhokamaga joylashtirildi.

Unga ko‘ra, har bir asalari oilasi uchun changlatish mavsumida oyiga bazaviy hisoblashning 40 foizi miqdorida subsidiya berish;

«O‘zbekiston asalarichilar» uyushmasi a’zolariga har yili asalari qishlovi davrida (oktyabr-aprel) ozuqa sotib olish uchun har bir asalari oilasiga bazaviy hisoblashning 30 foizi miqdorida davlat budjetidan subsidiya ajratish;

Uyushmaga a’zolik badalini har bir asalari oilasi uchun yiliga bazaviy hisoblash miqdorining 7 foizi etib belgilash ko‘zda tutilmoqda.

Qayd etilishicha, asalari boqish orqali kamida 100 ta xonadonda daromad manbaini tashkil etgan asalarichilik kooperatsiyalari 2022-yil 1-iyuldan boshlab 3 yil muddatga daromad va mulk solig‘i to‘lashdan ozod etiladi.

Shuningdek, import qilinadigan asalni qayta ishlash va qadoqlash asbob-uskunalari, asalarichilik inventar va uskunalari, asalari uyalarini tashish tirkamalari, asalari uyasini ishlab chiqarish uchun yog‘och, materiallar, penopoliuretan, butlovchi buyumlar va ehtiyot qismlar uchun boj bekor qilinadi.