Superog‘ir vazn toifasidagi bokschimiz, ikki karra Olimpiada chempioni Bahodir Jalolov bizning vaqt bilan ertaga tongda Kanadaning Monreal shahrida tashkil etiladigan oqshomda o‘zining navbatdagi jangini o‘tkazishi kerak edi.

Afsuski, uning fransiyalik Devid Spilmontga qarshi kechadigan jangi bekor qilindi. Bunga Jalolovning lab qismidan kichik uchuq chiqqani sabab qilib ko‘rsatilibdi. Bokschilar rasmiy tarozidan o‘tish marosimida qatnashib ulgurishgandi.

Bahodir Jalolov bu holat unda bolaligidan bo‘lib turishini, havo almashtirganda chiqib turinishi aytdi va o‘zi ham, raqibi ham jang qilishni istaganini aytdi. Ammo AQShdagi tibbiy komissiya jangga ruxsat bermagan.

«Olimpiadada ham uchuq chiqqan holda janglarni o‘tkazgandim, ammo bu yerda ruxsat berishmadi», dedi bokschi.

Ma’lumot uchun, Bahodir Jalolov prof faoliyati davomida hozirga qadar 14 ta jang o‘tkazib, ularning barchasida g‘alaba qozongan. Devid Spilmont esa shu kungacha 25 ta jang o‘tkazib, 16 g‘alaba, 8 mag‘lubiyat va 1 ta durang qayd etgan. G‘alabalarining 11 tasini nokaut orqali qo‘lga kiritgan.