Yana bir soatdan so‘ng (Nyu-York vaqti bilan soat 11:00 da) Jahon savdo markazi tarkibiga kiruvchi «WTC-3» osmono‘par binosi rasman ochiladi. Bu haqda «Usa.one» xabar bergan.

Binoning ochilish sanasi va vaqtida ramziylik bor: 11-sana, soat 11:00 — Jahon savdo markazi binolari 11-sentyabrda terrorchilik xuruji oqibatida yo‘q qilingan «egizak minoralar»ning o‘rnida qad rostlamoqda.

«WTC-3» («3 World Trade Center») 80 qavatli bo‘lib, 17, 60, 76-qavatlarida ochiq ayvonlar joylashgan. Bu Jahon savdo markazi kompleksiga kiruvchi besh osmono‘par binoning to‘rtinchisidir.

«WTC-3»ni qurish 2010 yili me’mor Richard Rojers rahbarligida boshlangan. Balandligi 329 metrni tashkil etuvchi «WTC-3» kompleksning ikkinchi baland binosiga aylanadi; kompleksning bosh binosi — «Ozodlik minorasi»ning balandligi 540 metr bo‘lib, 104 qavatdan iborat.

Ayni paytgacha bino umumiy maydonining 38 foizini ijarachilar band etib bo‘lishdi. Savdo maydonlari uchun besh qavat ajratiladi. Hozircha eng katta ijarachi — «GroupM» kompaniyasi to‘qqiz qavatdagi 700 ming kvadrat fut maydonni band etgan. Ijarachilar orasida «McKinsey» va «IEX» kabi taniqli nomlar ham bor.