Gibraltar dunyoda birinchi bo‘lib katta yoshli aholisini COVID-19ga qarshi emlash ishlarini yakunladi. Bu haqda payshanba kuni parlamentda Buyuk Britaniya sog‘liqni saqlash vaziri Mett Xenkok ma’lum qildi.

«Barcha hududlarimiz singari Gibraltarni ham vaksinalar bilan ta’minlayapmiz. Kecha Gibraltar dunyoda birinchi bo‘lib butun katta yoshli aholisi orasida vaksinatsiya dasturini nihoyasiga yetkazdi. Bu to‘g‘rida Parlamentni xabardor qilayotganimdan mamnunman», — dedi Xenkok.

Buyuk Britaniyaning okean ortidagi hududi — Gibraltar aholisi taxminan 34 ming kishini tashkil etadi. U yerda yashovchi chet elliklar ham emlash dasturidan foydalanish huquqiga ega.

Buyuk Britaniyada vaksinatsiya AstraZeneca va Pfizer preparatlari bilan amalga oshirilmoqda. 25 milliondan ortiq odam emlanib bo‘ldi. Bu esa Qo‘shma Qirollikni so‘zsiz Yevropa yetakchisiga hamda bu borada dunyo yetakchilaridan biriga aylantiradi.

Payshanba kuni Amerikaning Moderna kompaniyasi o‘zining vaksinasini aprel oyida Buyuk Britaniyaga jo‘nata boshlashini ma’lum qildi.