Гибралтар дунёда биринчи бўлиб катта ёшли аҳолисини COVID-19га қарши эмлаш ишларини якунлади. Бу ҳақда пайшанба куни парламентда Буюк Британия соғлиқни сақлаш вазири Мэтт Хэнкок маълум қилди.

«Барча ҳудудларимиз сингари Гибралтарни ҳам вакциналар билан таъминлаяпмиз. Кеча Гибралтар дунёда биринчи бўлиб бутун катта ёшли аҳолиси орасида вакцинация дастурини ниҳоясига етказди. Бу тўғрида Парламентни хабардор қилаётганимдан мамнунман», — деди Хэнкок.

Буюк Британиянинг океан ортидаги ҳудуди — Гибралтар аҳолиси тахминан 34 минг кишини ташкил этади. У ерда яшовчи чет элликлар ҳам эмлаш дастуридан фойдаланиш ҳуқуқига эга.

Буюк Британияда вакцинация AstraZeneca ва Pfizer препаратлари билан амалга оширилмоқда. 25 миллиондан ортиқ одам эмланиб бўлди. Бу эса Қўшма Қиролликни сўзсиз Европа етакчисига ҳамда бу борада дунё етакчиларидан бирига айлантиради.

Пайшанба куни Aмериканинг Moderna компанияси ўзининг вакцинасини апрель ойида Буюк Британияга жўната бошлашини маълум қилди.