Dori vositalarini global markirovkalash tizimini takomillashtirish bo‘yicha muhim qadam bugun PMEF-2025 ko‘rgazmasida qo‘yildi, unda Rossiya va O‘zbekiston markirovka tizimlari operatorlari – Istiqbolli texnologiyalarni rivojlantirish markazi (CRPT, «Chestniy znak») va CRPT TURON «Farmstandart» bilan hamkorlik memorandumini imzoladilar. Ushbu hujjat Markirovkalash va dori vositalarining transchegaraviy savdosi sohasida tajriba almashish va samarali yechimlarni ishlab chiqish uchun asosiy platformaga aylanadigan Kompetensiyalar markazini tashkil etish tashabbusini ilgari suradi.

Bitim ishtirokchilari transchegaraviy savdo bo‘yicha tajriba va tavsiyalar almashish uchun axborot kanallarini tashkil etish, ta’lim tadbirlarini o‘tkazish, qonunchilikdagi o‘zgarishlarni muhokama qilish, Rossiya va O‘zbekistonda markirovka tizimini takomillashtirish bo‘yicha tashabbuslarni qo‘llab-quvvatlashni rejalashtirmoqda.

«Ushbu hamkorlik «Chestniy znak» kodlari va xorijiy markirovka tizimlarini tan olish jarayonini rivojlantirishga yordam beradi, talablarni uyg‘unlashtirish va tartib-taomillarni soddalashtirish uchun rag‘batlar yaratadi, bu esa tibbiy preparatlar eksporti va importini sezilarli darajada osonlashtiradi», – deya ta’kidladi CRPT Direktorlar kengashi raisi Mixail Dubin.

«Memorandumning imzolanishi Rossiya va O‘zbekiston o‘rtasida dori vositalarni yetkazib berishning shaffof va ishonchli zanjirlarini o‘rnatish yo‘lidagi muhim qadamdir. Rossiyaning «Chestniy znak» va O‘zbekistonning «Asl Belgisi» davlat markirovka tizimlari kodlarining o‘zaro tan olinishi dori vositalarini tashish jarayonini tezlashtirish, kontrafakt xavfini kamaytirish va bemorlar xavfsizligini ta’minlash imkonini beradi», – dedi CRPT TURON bosh direktori Anatoliy Bachikalov.

«Bizning fikrimizcha, Rossiyada markirovka tizimini joriy etish kabi murakkab va ko‘p qirrali loyihani muvaffaqiyatli amalga oshirishning kaliti regulyator, CRPT va biznesning doimiy muloqoti bo‘ldi. Bu xatolar sonini minimallashtirish, optimal texnologik yechimlarni ishlab chiqish, tegishli xarajatlarni kamaytirish imkonini berdi. Loyihani amalga oshirish davomida biz katta tajriba to‘pladik. Tomonlarning sa’y-harakatlarini yanada birlashtirish va jarayonning barcha ishtirokchilarining o‘zaro hamkorligi uchun platforma sifatida Kompetensiyalar markazining tashkil etilishi muhim ahamiyatga ega bo‘lib, xorijiy hamkorlar bilan hamkorlikni mustahkamlashga xizmat qiladi», –deya xulosa qiladi «Farmstandart» bosh direktori Dmitriy Zaysev.

Ma’lumot uchun:

Istiqbolli texnologiyalarni rivojlantirish markazi (CRPT) operatori bo‘lgan «Chestniy znak» davlat markirovka tizimi Rossiyada 2019 yildan boshlab bosqichma-bosqich joriy etilmoqda. Uning maqsadi bozorda mahsulotlarning noqonuniy aylanishiga qarshi kurashishdir. Bugungi kunda markirovka 31 ta tovar guruhini qamrab oladi, yana 16 tasida bepul ixtiyoriy tajribalar o‘tkazilmoqda.