Buxoro viloyati G‘ijduvon tumanida fuqaro A.B. Fuqarolik ishlari bo‘yicha G‘ijduvon tumanlararo sudining 2024 yil 26 iyundagi ijro varaqasiga ko‘ra, «Davr bank» XATB Olmazor filiali foydasiga 411 mln 474,2 ming so‘m kredit qarzdorligini qoplashi kerak bo‘lgan.

Biroq, u qarzdorlikni qoplamay, hatto, o‘ziga tegishli bo‘lgan shaxsiy avtomashinasi – «Kia sportage» borligini ham yashirib yurgan. Qarzdorga nisbatan olib borilgan ijro harakatlari davomida «MIB Portal» dasturi yordamida qarzdor nomida bo‘lgan barcha mol-mulklarga ta’qiq qo‘yilgan. Va A.B. nomida avtotransport vositasi ham mavjudligi aniqlangan. Qidiruvga berilgan «Kia sportage» tuman hududidan topilib, tegishli tartibda vaqtincha saqlash uchun jarima maydonchasiga joylashtirilgan.

«Tijorat banklaridan olingan kreditlar shartnomada belgilangan tartibda qaytarilmagan taqdirda, kreditlar sud tartibida undirilishi va undiruv qarzdorning mol-mulklariga qaratilishi mumkin. Qarzdorga tegishli «Kia sportage»  sotish uchun auksion savdolariga chiqarilishi haqida rasman ogohlantirildi. Hozirda, ijro harakatlari olib borilmoqda», – dedi bu haqda «Xabar.uz»ga ma’lum qilgan MIBning Buxoro viloyati boshqarmasi jamoatchilik bilan aloqalar va huquqiy axborot bo‘yicha katta inspektori Ixtiyor Olimov.