O‘zbekiston 2030 yilga borib aholi daromadi o‘rtachadan yuqori bo‘lgan davlatlar qatoriga qo‘shilishni maqsad qilgan. Prezident Shavkat Mirziyoyev o‘z chiqishlarida mavjud resurs va imkoniyatlarni safarbar etgan holda aholi jon boshiga to‘g‘ri keladigan yalpi ichki mahsulot hajmini yanada oshirishni maqsad qilganini ko‘p bora ta’kidlab kelmoqda.

O‘zbekiston yangi iqtisodiy rivojlanish bosqichida ayniqsa xizmatlar sohasini jadal rivojlantirishga alohida e’tibor qaratyapti, zero, xizmatlar sohasi mamlakat iqtisodiy o‘sishi, arzon ish o‘rinlari yaratish, bandlikni ta’minlash va kambag‘allikni kamaytirishda muhim ahamiyat kasb etadi. Xalqaro mehnat tashkiloti hisob-kitobiga ko‘ra, xizmatlar sohasining 1 foizga o‘sishi kambag‘allikni o‘rtacha 1,5 foizga qisqartiradi.

Mamlakatimizda yalpi ichki mahsulotning 38 foizi va umumiy korxonalarning 60 foizi xizmatlar sohasiga to‘g‘ri keladi. Respublikada jami band aholining 50 foizdan ortig‘i xizmatlar sohasining ulgurji va chakana savdo, ta’lim, transport, davlat boshqaruvi, sog‘liqni saqlash va ijtimoiy xizmatlar sohalarida faoliyat yuritib kelmoqda.

Xizmatlar sohasining joylardagi «O‘zmilliybank» AJ ishtirokidagi rivojlanish jarayoni bilan Navoiy viloyati misolida tanishtirish maqsadida «O‘zmilliybank» AJ Matbuot xizmati tomonidan, joriy yilning 9-11 iyun sanalarida OAV vakillari uchun Press-tur tashkil etildi.
Dastlabki manzil «O‘zmilliybank» AJ ning Navoiy viloyati filiali bo‘ldi.

«O‘zmilliybank» AJ Navoiy viloyati filiali 1996 yil 12 nafar xodim bilan ish boshlagan bo‘lsa, bugun 280 nafar professional mutaxassis viloyat aholisiga, xorijlik mehmonlar, investorlar va yirik tadbirkorlik sub’yektlariga sifatli bank xizmatlarini ko‘rsatib kelmoqda.

Bugungi kunda «O‘zmilliybank» AJ Navoiy viloyatining turli hududlarida faoliyat yuritib kelmoqda. Jumladan, Qiziltepa tumanida, Karmana tumanida «Navoiy Erkin iqtisodiy zonasida», Uchkuduk shaxri va Zarafshon shaxarlarida bankning filiallari xizmat ko‘rsatib, aholiga sifatli bank xizmatlarini taqdim etmoqda.

Mazkur filiallar tomonidan ajratilgan kreditlar hisobidan Navoiy viloyatida katta intensiv bog‘lar, yirik sig‘imli zamonaviy muzlatgichlar, savdo va maishiy xizmat ko‘rsatish markazlari, umumiy ovqatlanish maskanlari tashkil topdi. 2021 yilda tarmoqlar bo‘yicha tahlil qilinganda:

• sanoat sohasida - 164,2 mlrd. so‘mlik 16 ta loyiha;
• qishloq xo‘jaligida – 101,8 mlrd. so‘mlik 28 ta loyiha;
• xizmat ko‘rsatishda - 18,5 mlrd. so‘m 38 ta loyihalar amalga oshirilgan.

Ushbu tadbirkorlik sub’yektlariga kredit mablag‘lari ajratilishi natijasida 10 640 ta yangi ish o‘rinlari yaratilgan.

Filialda jami 217,5 mingta mijozlarga xizmat ko‘rsatiladi. Shundan 209,3 mingtasi jismoniy shaxslar va 8,2 mingtasi yuridik shaxslar hisoblanadi. Jismoniy shaxslarning jami depozit qo‘yilmalari 415,9 mlrd. so‘mni tashkil etadi. To‘lov plastik kartochkalaridan foydalanishda qulayliklar yaratish maqsadida joylarda 28 ta bankomat, 12 ta infokioska, 3279 ta savdo terminallari dislokatsiya qilingan.

Bundan tashqari, aholiga valyuta amaliyotlarida qulayliklar yaratish maqsadida viloyat hududida filialga tegishli 7 ta valyuta ayirboshlash shaxobchasi va 24/7 rejimda xizmat ko‘rsatuvchi 2 ta avtomatlashtirilgan valyuta ayirboshlash shaxobchasi (bankomat) shaxar va tuman fuqarolariga hamda tashrif buyurgan mehmonlarga xizmat ko‘rsatmoqda.

Bankning filialida zamonaviy innovatsion bank xizmatlari ko‘rsatilishiga alohida ahamiyat qaratilgan. Bank mijozlarining 65 foizi masofadan boshqariladigan bank xizmatlaridan foydalanmoqdalar. Bunda hisobraqamlarda bank aylanmalarini amalga oshirish, kredit qarzdorligini qoplash, xalqaro va milliy plastik kartochkalarda xar qanday bank amaliyotlari hamda to‘lovlarni amalga oshirish, omonat rasmiylashtirish amaliyotlari, xorijiy valyutalarda konversion amaliyotlar, pul o‘tkazmalari kabi bank xizmatlaridan masofadan foydalanish mumkin.