Kuz faslida sog‘lom va tetik qolish – to‘g‘ri ovqatlanish, issiq kiyinish va immunitetni asrashga bog‘liq. Kuzgi sovuq va mavsumiy shamollashlardan himoyalanish uchun oddiy, ammo foydali qoidalarga amal qilish maqsadga muvofiqdir. Quyida kuz oylarida sog‘liqni tiklash va kasallikka chalinmaslik bo‘yicha eng muhim tavsiyalar jamlangan.

 Yeyishdan boshlaymiz...

Kuz – tabiat bizga eng sarxil va vitaminlarga boy meva hamda sabzavotlarni taqdim etadigan davr. Immunitetni baquvvat qilish uchun quyidagilarni taomnomaga kiriting:

Mavsumiy sabzavotlar. Oshqovoq, sabzi, lavlagi va karam tarkibida antioksidantlar hamda A va C vitaminlari juda ko‘p. Ayniqsa, oshqovoqli taom kuz uchun haqiqiy shifodir.

Meva va rezavorlar. Olma, anor, nok va na’matak choyi sizni virus va bakteriyalardan himoya qiladi.

Issiq taom va sho‘rvalar. Suyuq va issiq sho‘rvalar (ayniqsa, tovuq sho‘rva) tanani ichidan qizdiradi va moddalar almashinuvini yaxshilaydi.

Tabiiy antibiotiklar. Sarimsoqpiyoz, piyoz va zanjabil (imbir) qon aylanishini yaxshilab, mikroblarga qarshi kurashadi.

Qanday kiyingan ma’qul?

Kuz havosi aldamchi bo‘ladi: ertalab sovuq, tushda issiq, kechqurun esa yana izg‘irin kuzatiladi.

"Karam uslubi" (qatlamli kiyinish). Bir yo‘la qalin kiyim kiyishdan ko‘ra, bir nechta yengilroq kiyimni ustma-ust kiyish afzal (masalan: futbolka, ustidan ko‘ylak yoki sviter, ustidan kurtka). Havo isiganda bittasini yechib qo‘yish qulay.

Tabiiy matolar. Paxta va yungdan tayyorlangan kiyimlar tanani issiq tutadi va terini nafas oldiradi.

Oyoq va bosh kiyim. Oyoqlarni doimo quruq va issiq tuting. Namlik o‘tkazmaydigan poyabzal va shamoldan himoya qiluvchi yengil bosh kiyim (shapka) sizni xastalikdan asraydi.

Shamollashdan saqlanish uchun...

Immunitetni kuzgi injiqliklarga tayyorlashda quyidagi odatlarni shakllantiring:

Suv balansini saqlang. Kun davomida iliq suv, limonli choy yoki na’matak damlamasini ichib yuring.

 Shaxsiy gigiyena...

Ko‘chadan kelganda qo‘llarni sovunlab yuvish va burun-tomoqni tuzli suvda chayish viruslar tarqalishining oldini oladi.

Xonani shamollatish. Uy va ishxona xonalarini kuniga kamida 2 marta 10-15 daqiqa davomida shamollatib turing. Quruq havoda viruslar tez ko‘payadi.

Uyqu va dam olish. Kuniga kamida 7-8 soat uxlash tananing tiklanishi va immunitet tizimi to‘g‘ri ishlashi uchun juda muhim.

Siz kuz faslida o‘zingizga g‘amxo‘rlik qilish orqali nafaqat shamollashdan saqlanasiz, balki oltin faslning go‘zalligidan to‘liq zavq ola olasiz! Buning uchun, eng muhimi, erinmang va qoidalarga amal qiling.

A.Fathullayev