Senat 28-may kuni sotuvchilarning oldi-sotdi shartnomasidagi majburiyatlarni o‘z vaqtida bajarishga doir qo‘shimchalarni qabul qildi. Bu haqda Senat yalpi majlisida ma’lum qilindi.

Qonunga ko‘ra, agar sotuvchi shartnomada belgilangan muddatda tovarni yetkazib bermasa, kechiktirilgan har bir vaqt birligi uchun majburiyatning bajarilmagan qismi narxining 0,5 foizi miqdorida penya to‘lashi lozim. Penya umumiy summasi esa topshirilmagan tovar narxidan oshmasligi shart.

Qonunda sotuvchining tovarni kechiktirib yetkazishi oqibatida yuzaga kelgan zarar penya bilan qoplanishi shartligi, lekin agar kechikish iste’molchining aybidan bo‘lsa, penya to‘lashdan ozod etilishi ko‘zda tutilgan.

Qayd qilinishicha, 2024-yilda Raqobatni rivojlantirish va iste’molchilar huquqlarini himoya qilish qo‘mitasiga 30,70 mingta murojaat kelib tushgan bo‘lib, ulardan 4,2 mingtasi tovarlarni o‘z vaqtida yetkazib berilmasligi bilan bog‘liq shikoyatlardir. Avtomobillarni yetkazib berishdagi muddat buzilishlari esa 5,3 mingta holatda qayd etilgan.