Bugun, 31 mart kuni Buxoro viloyatining uchta tumaniga yangi rahbarlar tayinlandi. Bu haqida «kun.uz» xabar berib o‘tdi.

Viloyat hokimi O‘ktam Barnoyev Vobkent, Romitan va Buxoro tumanlarida o‘tkazilgan Xalq deputatlari kengashilarining navbatdan tashqari sessiyaslarida ishtirok etib, yangi hokimlarni tanishtirgan.

Kun.uz manbasi xabar berishicha, 2009 yildan beri Vobkent tumani hokimi lavozimida faoliyat yuritayotgan Askar Nazarovich Javodov lavozimidan olinib, o‘rniga Peshko‘ tumani hokimining sanoatni rivojlantirish, kapital qurilish, kommunikatsiyalar va kommunal xo‘jalik masalalari bo‘yicha o‘rinbosari Bahodur Sanoyevich Bafoyev Vobkent tumani hokimi vazifasini bajaruvchi etib tayinlangan.

Foto: Bahodur Bafoyev

Buxoro tumani hokimi Muhiddin Turdiyevich Esanov boshqa lavozimga o‘tgani sababli lavozimidan ozod qilinib, uning o‘rniga Qahramon Bozorovich Dustov Buxoro tumani hokimi etib tayinlangan.

Foto: Qahramon Dustov

Shuningdek, vaqtinchalik Romitan hokimi vazifasini bajarib kelayotgan Baxriddin Shamsiyevich Xalimov o‘rniga Romitan hokimining iqtisodiyot va tadbirkorlik masalalari bo‘yicha birinchi o‘rinbosari Xurshid Yahyoyevich Tohirov yangi hokim bo‘lgan.

Eslatib o‘tamiz, Prezident Shavkat Mirziyoyev 29-30 mart kunlarida Buxoro viloyatida bo‘lib, hududda amalga oshirilayotgan ishlar bilan tanishdi. Tashrif yakunida Prezident raisligida Buxoro viloyatini ijtimoiy-iqtisodiy rivojlantirish masalalariga bag‘ishlangan faollar yig‘ilishi o‘tkazildi.