Bugun, 10-yanvar kuni KXShT Kollektiv xavfsizlik kengashining sessiyasi bo‘lib o‘tdi. O‘zaro muloqot Qozog‘istonda yuz bergan namoyishlar va tartibsizliklar oqibatida halok bo‘lganlar  xotirasiga bir daqiqalik sukut bilan boshlandi. Bu haqda Zakon.kz nashri xabar bermoqda.

«Yanvar oyida bir necha kun davomida Qozog‘iston keng ko‘lamli inqirozni boshidan kechirdi. Bu mustaqillikning 30 yillik tarixidagi eng qiyin vaziyat bo‘ldi.  Umuman olganda, mamlakatimiz  hozirgacha bunday darajadagi haqiqiy tahdidga duch kelmagan»,— deya ta’kidlagan Qozog‘iston Prezidenti Qosim-Jo‘mart To‘qayev.

Eslatib o‘tamiz, 10-yanvar — Qozog‘istonda umumxalq motam kuni sifatida e’lon qilingandi.

Rasmiylar ma’lumotga ko‘ra, Qozog‘istonda shu kungacha yuz bergan namoyishlar va tartibsizliklar oqibatida jami 164 kishi halok bo‘ldi.

Ularning ko‘pchiligi, ya’ni 103 nafari Olmaotada qurbon bo‘lgan. Qizilo‘rda viloyatida 21 kishi, Jambulda esa 10 kishi hayotdan ko‘z yumgan.

Hodisalar 4 yanvar kuni Qozog‘istonda aholi suyultirilgan gaz narxini pasaytirishni so‘rab namoyishga chiqqan kundan boshlangandi.