Kecha, 21 sentyabr kuni soat 11:35 da Toshkent shahrining Yashnobod tumanidagi «Oltin tegirmon» yuk bekatida yuk poyezdining ikkita vagoni (don tashuvchi sisternalar) relsdan chiqib ketdi. Bu haqda Toshkent shahar IIBB matbuot xizmati xabar berdi.

Voqeadan odamlar jabrlangani yo‘q. Faqat relsdan chiqib ketgan vagonlar atrofdagi to‘siq va devorni qisman buzgan.

Voqea joyida IIV Transportda jamoat xavfsizligini ta’minlash boshqarmasi, FVV, hokimlik va Toshkent shahar IIBB vakillari ish olib borishyapti. Hodisa sabablari va ziyon qiymati aniqlanmoqda.

P.S. O‘zbekiston Respublikasi IIV Jamoatchilik va ommaviy axborot vositalari bilan aloqalar boshqarmasi xabar berishicha, Toshkent shahrining Yashnobod tumanida 21-sentyabr kuni Farg‘ona yo‘li ko‘chasidan o‘tgan «Hamza» temir yo‘l bekatining qo‘shimcha yo‘lida turgan teplovozi bo‘lmagan 5 dona yuk vagoni qarovsiz qoldirilishi hamda vagon g‘ildiraklari ostiga qo‘yilgan g‘ildiraklarni ushlab turuvchi moslama to‘liq qotirilmaganligi sababli, ikkita bo‘sh yuk vagonlari yurib ketib, temir yo‘l izidan chiqib ketgan va Farg‘ona yo‘li 7-tor ko‘chasidagi uyning devoriga borib urilgan.

Surishtiruv ishlari davom etmoqda.