JCh-2026 hal qiluvchi saralash bosqich 6-turida O‘zbekiston terma jamoasi Laosda Shimoliy Koreya mehmoni bo‘ldi.

Eldor Shomurodov va Otabek Shukurov jarohat sabab maydonga tushmadi.

Birinchi taymda raqibdan biroz ustunlikka erishgan vakillarimiz Abbosbek Fayzullayevning goli evaziga oldinga chiqib oldi — 1:0.

Ikkinchi bo‘limda futbolchilarimiz negadir «ikkinchi raqam» ostida harakat qilishdi. Oqibatda o‘yin jilovi va maydondagi ustunlik to‘liq koreyslar nazoratiga o‘tdi. Juda og‘ir jazolanishimiz ham mumkin edi. Faqat omad va darvozabonimiz bizni asrab qoldi. 83-daqiqada bosh hakam Umarbek Eshmurodovning qo‘polligini VAR orqali tekshirib, uni maydondan chetlatdi. 10 kishi qolgan jamoamiz darvozasi tomon penalti belgilandi. Jamoamiz baxtiga bu safar ham darvozabon O‘tkir Yusupov 11 metrlik jarima zarbasini qaytara oldi. U 1-davrada Toshkentda o‘tgan bahsda ham koreyslarning penaltidan yo‘llagan zarbasini bartaraf eta olgandi. Yusupov keyinroq raqibning yana bir xavfli zarbasini qaytardi.

O‘zbekiston eng yomon o‘yinlaridan birida eng muhim ochkolarni shu tariqa qo‘lga kiritib, guruhda 13 ochko bilan 2-o‘rinda bormoqda. Guruh yetakchisi Eron bugun Qirg‘iziston mehmoni bo‘ladi, BAA va Qatar esa o‘zaro kurashadi. O‘zbekiston navbatdagi turni keyingi yilning mart oyida Toshkentda Qirg‘izistonga qarshi o‘tkazadi.

JCh-2026 saralashi.

A guruhi. 6-tur

KXDR – O‘zbekiston – 0:1

Gol: Abbos Fayzullayev, 44

KXDR: 1.Kang Ju Xyok, 3.Jang Kuk Chol, 4.Kim Pom Xyok, 9.Ri Jo Guk (11.Jon Il Gvan, 70), 10.Xan Kvang Song, 13.Ri Il Song, 14.Choe Ok Chol, 15.Ri Un Chol, 16.Kim Yu Song, 17.Kang Kuk Chol, 20.Paek Chung Song (22.Pak Kvang Xun, 70)

O‘zbekiston: 1.O‘tkir Yusupov, 2.Abduqodir Husanov, 3.Hojiakbar Alijonov, 6.Akmal Mozgovoy, 9.Odil Hamrobekov, 13.Sherzod Nasrullayev, 10.Jaloliddin Masharipov (11.Azizbek Amonov, 80), 15.Umarbek Eshmurodov, 17.Bobur Abduxoliqov (20.Hojimat Erkinov, 64), 22.Abbosbek Fazullayev (19.Azizbek Turg‘unboyev, 79), 23.Husniddin Aliqulov.

Chetlatish: Umarbek Eshmurodov, 83.