Буюк Британия Яқин Шарқдаги ҳарбий объектларини кучайтириш учун HMS Prince of Wales авиаташувчисини минтақада жойлаштириш ниятида эмас. Бу ҳақда Financial Times нашри мамлакат бош вазири девони вакилига таяниб хабар берди.

Унинг сўзларига кўра, «кема юбориш бўйича ҳеч қандай қарор қабул қилинмаган».

7 март куни Sky News телеканали манбага таяниб, Британия Англиянинг Портсмут шаҳрида жойлашган Prince of Wales авиаташувчисини эҳтимол Яқин Шарққа юборишга тайёрланаётгани ҳақида хабар берган эди.

Аввалроқ, 14 февраль куни Буюк Британия бош вазири Кир Стармер Мюнхен хавфсизлик конференциясида нутқ сўзлаб, 2026 йилда Лондон Шимолий Атлантика ва Арктика ҳудудларига авиаташувчи зарба гуруҳини юборишини маълум қилган. Бу гуруҳга айнан Prince of Wales авиаташувчиси бошчилик қилиши айтилган.

Айни пайтда Британиянинг иккинчи авиаташувчиси – HMS Queen Elizabeth модернизация жараёнидан ўтмоқда.

Шу тариқа, Лондон ҳозирча Яқин Шарқдаги кескин вазиятга қарамай, авиаташувчисини минтақада жойлаштириш бўйича қарор қабул қилмаган.

Эслатиб ўтамиз, аввалроқ Яқин Шарқдаги можаро фонида Франциянинг Шарл де Голл авиташувчи кемаси Ўрта ер денгизи ҳудудига етиб келгани хабар қилинган эди.

Маълум қилинишича, авиаташувчи у ерда Эрон зарбаларига учраган Франция фуқаролари ва унинг иттифоқчилари хавфсизлигини таъминлаш бўйича операцияларда иштирок этади.