Собиқ десантчи Карл Бушби 1998 йилда якка ўзи дунё бўйлаб пиёда саёҳатга отланганида 28 ёшда эди. Орадан роппа-роса шунча вақт ўтиб, у «Голиаф» деб номланган экспедициясини якунлади ва ниҳоят ватани Англияга қайтиб келди.

Саёҳатчи олдига иккита қатъий шарт қўйган эди: ҳеч қандай транспортдан фойдаланмаслик ва ўз юртига фақат ўз кучи билан етиб бориш.

Унинг саёҳати Чилидан бошланган. Қарийб ўттиз йиллик сафар давомида у кўплаб синовларни бошдан кечирди:

• 2001 йилда Марказий ва Жанубий Америка оралиғидаги чангалзорларда қуролли гуруҳ қўлига асир тушиб қолди. Маҳаллий жангарилар унинг кимлигини ва мақсадини билишгач, қўйиб юборишди ҳамда керакли йўл анжомлари билан таъминлашди;
• 2006 йилда Карл Бушби Беринг бўғозини муз устидан пиёда босиб ўтган дунёдаги илк инсонга айланди. Иккинчи уринишда у денгиз музликлари бўйлаб қарийб 240 км йўл босиб, Чукоткага етиб борди;
• У бир неча йил давомида Россия ҳудуди орқали ҳаракатланди, бироқ молиявий инқироз, виза муаммолари ҳамда пандемия туфайли режалари ва йўналишини тез-тез ўзгартиришга мажбур бўлди. Оқибатда сайёҳ Мўғулистон, Хитой, Қозоғистон ва Ўзбекистон орқали ўтишга қарор қилди;
• У Каспий денгизини 31 кунда сузиб ўтди ва сувда тахминан 132 соат вақт ўтказди. Шу тариқа у Қозоғистондан Озарбайжонга, у ердан эса Туркия ва Европага ўтиб олди;
• 2026 йилнинг июн ойида Карл Францияга етиб келди. Британияга Ла-Манш бўғози остидаги хизмат йўлагидан ўтишга рухсат беришмагани сабабли у яна сузишга мажбур бўлди. Мазкур бўғозни кесиб ўтиш 3 кун давом этди ва у шундан қарийб 20 соатини сув ичида ўтказди.

Кеча, 2 ноябр куни у ниҳоят ўзи туғилиб ўсган Ҳалл шаҳрига етиб келди. У ерда сайёҳни онаси, ўғли ва ҳаётида илк бор кўриб турган 12 ёшли набираси кутиб олди.

Карл бундан буёғига нима билан шуғулланишни ҳали ўйлаб кўрмаганини айтди.