«Passport Index»нинг 2026 йилги янгиланган рейтингида БАА паспорти дунёда энг кучли деб топилди. Амирликларнинг WAM ахборот агентлиги хабарига кўра, эндиликда БАА фуқаролари олдиндан виза расмийлаштирмасдан 182 та давлатга эркин саёҳат қилишлари мумкин.

Ушбу кўрсаткич билан БАА Сингапур ва Малайзия каби собиқ етакчиларни ортда қолдириб, яққол пешқадамга айланди (мазкур икки мамлакат 175 та йўналиш билан иккинчи ўринни эгаллаб турибди). Кучли учликни Испания якунлаб берди (174 та йўналиш).

Агентликнинг таъкидлашича, Амирликларнинг бу муваффақияти рейтингдаги шунчаки қуруқ рақам эмас, балки мамлакатнинг жаҳон ҳамжамиятидаги юксак нуфузи ҳамда унга бўлган халқаро ишонч рамзидир.

БАА паспортининг умумий ҳаракатчанлик кўрсаткичи 182 тани ташкил этади. Шундан 138 та давлатга тўлиқ визасиз, 44 тасига эса соддалаштирилган тартибда (чегарада ёки онлайн) кириш имконияти мавжуд. Дунёда фақатгина 16 та мамлакат Амирликлар фуқароларидан анъанавий виза талаб қилади, холос.

«Arton Capital» компанияси томонидан юритиладиган ушбу рейтинг дунё давлатлари паспортлари тақдим этадиган саёҳат эркинлиги даражасини баҳолайди. Бунда фуқароларнинг сафарга чиқишдан олдин виза олмасдан бора оладиган йўналишлари сони асосий мезон қилиб олинади.

«Passport Index» дунёдаги илк интерактив платформа бўлиб, паспортларнинг эркинлик даражасини реал вақт режимида янгилаб борувчи ягона глобал рейтингдир. Бошқа тизимлардан фарқи, унда маълумотлар тезкорлик билан янгиланади. Яъни, бирор мамлакат виза имтиёзи жорий қилса ёки талабларни ўзгартирса, бу рейтингда шу заҳоти акс этади.

Дунёнинг энг кучли паспортлари қаторидан, шунингдек, Белгия, Люксембург, Франция, Дания, Германия, Швеция, Нидерландия, Финляндия, Италия, Швейцария, Греция, Португалия, Австрия, Хорватия, Норвегия, Ирландия ва Япония жой олди. Ушбу давлатлар паспортлари ўз эгаларига 173 та мамлакат эшикларини очади.

Ўзбекистон паспорти мазкур рейтингда 73-ўринни эгаллаб турибди (маълумот учун, бир хил балл тўплаган бир нечта давлат битта поғонада кўрсатилади. Масалан, юқоридаги Белгиядан Япониягача бўлган 17 та мамлакат 4-ўринда қайд этилган). Ҳозирда юртдошларимиз олдиндан анъанавий виза расмийлаштирмасдан жами 69 та давлатга саёҳат қилишлари мумкин.