АҚШда коррупцион можаро юзага келди: «The Financial Times» аниқлик киритишича, бу воқеалар марказида Дональд Трампнинг собиқ маслаҳатчиси Стивен Бэннон турибди.

Оқ уй собиқ «бош стратеги» Мексика билан чегарада «Трамп девори» қурилишига хайрия қилинган пулларни ўзлаштириб юборганликда айбланмоқда.

Прокуратура маълумотларига кўра, бу ерда гап алданиб қолган юз минглаб америкаликлар (ва уларнинг пуллари) ҳақида кетяпти. Бэннонга қўшиб яна уч шахсга қарши суриштирув бошланган. Трамп оиласи ушбу фирибгарлик ўйинидан бехабар эканини билдирди, деб ёзмоқда «The Huffington Post».

Президент Трампнинг муҳожирларга қарши сиёсати ўлароқ, Мексика билан ўртада девор қуриш ғояси бошиданоқ яхши кутиб олинмаганди, айниқса, улкан қурилишни молиялаштириш масаласи «осилиб» қолди. Хусусан, Пентагон бюджетидан умидвор бўлган Трампнинг режаси чиппакка чиққач, девор қисман нодавлат пулларига қурилмоқда. Буларни эса еб кетувчилар топилган...

Эслатиб ўтамиз, Стив Бэннон президент маслаҳатчиси лавозимидан 2017 йилда кетган.