1980 йилда янги ташкил этилган Эрон Ислом Республикасининг биринчи президенти этиб сайланган Aбулҳасан Банисадр шанба куни 88 ёшида Париждаги Сальпетриер шифохонасида оламдан ўтди, деб хабар бермоқда Fars агентлиги.

«Ислом Республикасининг биринчи президенти Aбулҳасан Банисадр 89 ёшида Париждаги Сальпетриер шифохонасида вафот этди», — дейилади агентлик хабарида.

Aгентлик ўлим сабабларига аниқлик киритмаган.

1979 йили Эронда Муҳаммад Ризо Паҳлавий (1941-1979) бошчилигидаги подшоҳлик ағдарилиши натижасида Эрон Ислом Республикаси ташкил топди. Ҳукумат тепасига оятуллоҳ Руҳуллоҳ Ҳумайний бошчилигидаги шиа руҳонийлари келди ва у Эрон олий раҳбарига айланди.

Банисадр Ҳумайнийнинг сафдоши бўлган ва инқилобий органларда кўплаб юқори лавозимларни эгаллаган: у Ислом инқилоби кенгашининг аъзоси бўлган, кейин унинг ўринбосари этиб тайинланган, иқтисод ва молия вазири, шу билан бирга, ташқи ишлар вазири лавозимларида фаолият кўрсатган. Шунингдек, у Эроннинг биринчи конституциясини ишлаб чиқишда иштирок этган.

Банисадр 1980 йил 25 январда 76,5% овоз тўплаб президент этиб сайланган. Aммо 1980 йилда бошланган Эрон-Ироқ уруши туфайли Ҳумайний Банисадрни мамлакат ва ҳарбий ҳаракатларни бошқара олмасликда айблаб, бош қўмондонлик ваколатларини олиб қўйди.

1981 йил июнь ойида парламент Банисадрга «ислом руҳонийларига қарши қаратилган фаолияти учун» импичмент эълон қилди. Сўнгра Ҳумайнийнинг ўзи Банисадрни президентликдан озод қилиш тўғрисидаги фармонга имзо чекди. Шундан кейин Банисадр бошқа қатор сиёсатчилар билан бирга Эрондан ҳижрат қилган.