Франция “Миллий якдиллик” партияси вакили Марин Ле Пен 2027 йилги президентлик сайловида ўз номзодини қўйишини маълум қилди. Сешанба куни аппеляция суди Марин Ле Пеннинг сайловда қатнашишига доир тақиқ муддатини камайтиргани ортидан унга навбатдаг сиёсий кампания учун йўл очилганди.

Қонунчилик идораси фаолияти учун ажратилган маблағни ғайриқонуний тарзда сарфлашда айбланган ва шартли жазога ҳукм қилинган Марин Ле Пенга электрон браслет тақиб юриш мажбурияти ҳам юкланган эди. Сиёсатчи эндиликда электрон браслет тақиб юриш мажбуриятини бекор қилиш бўйича судга мурожаат қилишини айтган.  

Таҳлилчиларга кўра, 2027 йилги сайловда Марин Ле Пен қатнашгудек бўлса, унинг ғалаба қозониш имконияти ўта юқори саналади. Ижтимоий сўровлар у биринчи турда рақибини 32-38 фоизга қадар овоз йиғиб, катта фарқ билан ютишини кўрсатмоқда. Унга мамлакат собиқ бош вазири, “Горизонт” партияси вакили Эдуар Филипп асосий рақиб бўлиши мумкин. Марказчи ҳисобланган Эдуар Филипп мухолифи Ле Пенни енгиши учун ўнг марказчи ва сўлларни ҳам ўз ортидан эргаштириши талаб этилади.

Марин Ле Пенга нисбатан жазонинг енгиллаштирилиши ва унинг президентлик сайловида қатнашмоқчи экани нафақат Франция, балки бутун Европа Иттифоқидаги мўътадил кучларни хавотирга солаётган ҳодиса саналади.

Гап шундаки, миллийликни байроқ қилган Ле Пен Европа Иттифоқи ҳамда евро ҳудудидан чиқишни ёқлайди. Агар тарих чархпалаги терс айланиб,  бир неча бор ирқий, диний нафрат қўзғашда айбланган сиёсатчи хоним давлат тепасига келгудек бўлса, бу расмий Брюссель учун катта даҳмаза бўлиши аниқ. Негаки, ЕИнинг ташкилотчиларидан бўлган Франциянинг тузилма таркибидан буткул чиқиши у ёқда турсин, иттифоқни қўллаб-қувватламаслигининг ўзиёқ сиёсий зилзилаларга олиб келади.

Боз устига, Марин Ле Пен миллатчилик руҳидаги сиёсати билан ўзи шундоқ ҳам пароканда бўлаёзган мамлакатда тафриқани янада кучайтириб юбориши ҳеч гап эмас.

Ле Пен жамоат жойларида аёлларнинг ҳижобда юришини тақиқлашни таклиф этгани маълум. У ушбу таклиф билан чекланиб қолмай ислом мафкураси ҳақида номақбул айбловларни ҳам илгари сурган.   

Европа парламенти вакиллари фикрича, ўта ўнг қанотга мансуб Марин Ле Пеннинг Франция президенти бўлиши имконияти ошиб бормоқда.

Яқин-яқингача Марин Ле Пен ҳамда унинг мўътадил йўналишдаги рақиблари ўртасидаги тафовут жуда катта эди. Масалан, 2017 йилги сайловда Эммануэль Макрон ишончли тарзда ғалаба қозонганди: у 66 фоиз овоз йиққан бўлса, Ле Пен атиги 34 фоиз электорат қўлловига эришган эди.

2022 йил апрель ойидаги сайловнинг иккинчи турида эса Макрон 58,55 фоиз, Ле Пен  эса 41,45 фоиз овоз йиғишга муваффақ бўлган.

Пировардида Ле Пен Макронга қўнғироқ қилиб, Франция президентлиги учун сайловда ўз мағлубиятини тан олган.

Францияда ўта ўнг қанотга мансуб сиёсатчининг президентлик курсисини эгаллаши мисли кўрилмаган ҳодиса бўлиш баробарида мисли кўрилмаган ўзгаришларга дебоча бўлиши мумкин. Аввалроқ Марин Ле Пеннинг давлат раҳбари этиб сайланиши фуқаролар урушига олиб келиши башорат қилинган эди.