Исроил Бош вазири Бенямин Нетаняҳу Франция президенти Эммануэл Макроннинг Фаластин давлатини тан олиш ҳақидаги қарорини қоралади.

«Бундай ҳаракат терроризм учун мукофот. Ҳозирги шароитда Фаластин давлати Исроил билан тинч-тотув яшаш учун эмас, балки уни йўқ қилиш учун трамплинга айланади. Аниқроқ айтганда, фаластинликлар Исроил билан ёнма-ён давлат қуришни эмас, балки Исроил ўрнига ўз давлатларини барпо этишни хоҳлайдилар», – деди Нетаняҳу.

Мудофаа вазири Исраэл Кац эса Исроил ўз хавфсизлигига таҳдид солувчи Фаластин тузилмасининг яратилишига йўл қўймаслигини айтиб чиқиш қилди.

Ўз навбатида, АҚШ Давлат котиби Марко Рубио Қўшма Штатлар Макроннинг режасини «қатъий рад этишини» айтди.

«Бу – ўйланмасдан қилинган қарор бўлиб, фақатгина ҲАМАСнинг тарғиботи учун хизмат қилади ва тинчлик жараёнини издан чиқаради. Бу 7 октябрь кунидаги ҳужум қурбонларига урилган тарсаки бўлди», – деб ёзди Рубио Х ижтимоий тармоғида.

Эслатиб ўтамиз, Эммануэл Макрон 24 июль куни Франция Фаластинни мустақил давлат сифатида тан олишини ва у бу ҳақда БМТ Бош Ассамблеясида расман маълум қилишини айтган.