Бирлашган Араб Амирликлари Премьер-лиганинг «Манчестер Сити» клубига нисбатан чиқарган қатъий қарорига жавобан, Буюк Британия иқтисодиётига киритилаётган миллиардлаб фунт стерлинг ҳажмидаги бўлажак инвестицияларини тўхтатиб қўйиши мумкин. The Telegraph нашри хабар беришича, ушбу дипломатик инқироз икки давлат ўртасидаги йирик лойиҳаларни хавф остига қўймоқда.

Абу-Даби расмийлари Британия ҳукуматини ушбу суд қарори Амирликларнинг мамлакатга бўлган инвестицион ишончига салбий таъсир кўрсатганидан огоҳлантирган. Оқибатда, БАА томонидан молиялаштирилиши кўзда тутилган ва Британия илм-фани учун стратегик аҳамиятга эга Оксфорд — Кембриж технологик йўлаги лойиҳаси тўхтаб қолиш арафасида турибди.

Эслатиб ўтамиз, БАА вице-президенти Шайх Мансур бин Зоид Ол Наҳаёнга тегишли «Манчестер Сити» клуби молиявий фейр-плей қоидаларини бузганликда айбланиб, унга қарши қўйилган 115 та айбловдан 114 тасида айбдор деб топилди. Клуб, жумладан, ўз молиявий кўрсаткичларини сунъий равишда 900 миллион фунт стерлингдан кўпроққа ошириб кўрсатганликда айбланмоқда.

Ўз навбатида, «Манчестер Сити» клуби раҳбарияти АПЛ комиссиясининг ушбу қарори мутлақо ноҳақ эканини таъкидлаб, расман аппеляция беришини маълум қилди.