Баъзи муҳаббатлар борки, улар тўй билан бошланиб, ажралиш билан якун топмайди. Бундай севги йиллар, масофалар ва аламларни енгиб ўтиб, инсон умрининг охиригача давом этади. Ҳинд киноси тарихидаги энг машҳур жуфтликлардан бири – Ражеш Кханна ва Димпл Кападиянинг ҳаёти худди шундай қисмат эди.

Миллионларнинг орзусидаги эркак

1942 йил 29 декабрда туғилган Ражеш Кханна 1970 йиллар бошида Ҳиндистоннинг киноюлдузига айланган эди. Уни оддий актёр деб аташ қийин. Ражеш Кханна  мамлакатдаги биринчи ҳақиқий “суперюлдуз” сифатида танилди.

Унинг фильмлари кетма-кет хитга айланар, кинотеатрлар олдида узундан-узоқ навбатлар ҳосил бўларди. Мухлисалар актёрни кўриш учун соатлаб кутишар, баъзилари эса сурати билан рамзий никоҳ ҳам ўқитгани ҳақида ривоятлар тарқалган эди. Ражеш Кханна шунчаки актёр эмас, балки бутун бир даврнинг рамзи эди.

 16 ёшли гўзалнинг тақдири

1957 йил 8 июнда туғилган Димпл Кападия эса кино оламига метеор каби кириб келди. 1973 йилда экранларга чиққан «Бобби» фильми уни бир кечада бутун мамлакатга машҳур қилди. Фильм намойишидан кейин миллионлаб томошабинлар Димплнинг гўзаллиги ва истеъдоди ҳақида гапира бошладилар.

Бироқ кутилмаганда, шон-шараф энди бошланган пайтда, Димпл кинони тарк этишга қарор қилди.

1973 йил март ойида, Димпл ҳали 16 ёшга ҳам тўлмаган пайтда, 30 ёшли Ражеш Кханнага турмушга чиқди. Улар ўртасида салкам 15 йиллик ёш фарқи бор эди. Бу никоҳ Ҳиндистонда ҳақиқий шов-шувга айланди. Дарвоқе, Димплнинг никоҳ пайтидаги ёши ҳақида турли манбаларда 15 ва 16 ёш деган маълумотлар учрайди. Расмий туғилган санаси (8 июнь 1957) ва никоҳ санасига (март 1973) кўра, у амалда 15 ёшу 9 ойлик бўлган, яъни ҳали 16 ёшга тўлмаган эди.

Никоҳнинг дастлабки йиллари нисбатан тинч-сокин кечди. 1974 йил 29 декабрда уларнинг биринчи қизи Твинкл Кханна туғилди. 1977 йил 27 июлда эса иккинчи қизалоқ – Ринке Кханна дунёга келди.

Димпл оиласи учун кинони тарк этган эди. Ражеш эса ҳали ҳам юлдузлик шон-шарафидан баҳраманд бўлаётганди. Аммо вақт ўтиши билан муаммолар бўй кўрсата бошлади.

Қуёш ботишни бошлаганда

1970 йилларнинг охирига келиб Болливуд осмонида янги юлдуз – Амитабҳ Баччан порлай бошлади. Томошабинларнинг диди ўзгарди. Бир пайтлар касса қироли бўлган Ражеш Кханнанинг фильмлари аввалгидек муваффақият қозонмай қўйди. Бу ҳолат унга қаттиқ таъсир қилди. Яқинлари айтишича, Ражеш тушкунликка тушиб, ичкиликка ружу қўйган.

Оиладаги муносабатлар ҳам аста-секин ёмонлашиб борди. Бунинг сабаби...

1983 йилда «Souten» фильми суратга олинаётган пайтда Ражеш Кханна ва ёш актриса Тина Муним ҳақида турли гап-сўзлар тарқалди. Фильмнинг бир қисми Лондонда тасвирга олинган. Ўша ерда Димпл ҳам бўлгани ҳақида кўплаб манбалар ёзган. Айрим гувоҳларнинг таъкидлашича, у эри Ражеш ва Тинанинг жуда яқин муносабатини кўриб қаттиқ ранжиган.
Ҳақиқат қандай бўлганини фақат уларнинг ўзи билади. Аммо бир тафсилот аниқ: айнан шу фурсатдан сўнг уларнинг никоҳи амалда якунланган.

1984 йилда Кападиа икки қизини олиб, Кханнанинг уйини тарк этди. Ўшанда Димпл 26 ёшда, Ражеш эса 41 ёшда эди.

27 йиллик айрилиқ

Энг ҳайратланарли жиҳати шундаки, улар ҳеч қачон расман ажрашмадилар.

Айрилиқдан кейин Димпл кино оламига қайтди. 1985 йилда чиққан “Saagar” фильми унинг тантанали қайтишига айланди. Кейинчалик актриса ўнлаб фильмларда роль ўйнаб, Ҳиндистоннинг энг кучли драматик актрисаларидан бири сифатида танилди.

Ражеш Кханна эса кино билан бир қаторда сиёсатга ҳам кириб келди.
1991 йилда у парламент сайловларида иштирок этди ва кейинчалик Ҳиндистон парламенти депутати бўлиб фаолият юритди. Бироқ Кханна ҳаётидаги энг ёруғ давр аллақачон ортда қолган эди.

Ражеш ва Димпл бир-бири билан бутунлай алоқани узгани йўқ. Қизларининг тўйлари, оилавий маросимлар ва муҳим воқеаларда учрашиб туришди. Муҳаббат тугаган бўлиши мумкин, аммо меҳр ва ўзаро ҳурмат-эҳтиром сақланиб қолган эди.

Сўнгги кунлар

2011 йил охири ва 2012 йил бошларида Ражеш Кханнанинг соғлиғи ёмонлаша бошлади. У оғир касаллик – саратон билан курашаётган эди. Шу пайтда ҳаёт кутилмаган бурилиш ясади. Салкам 27 йил аввал Ражеш Кханнани тарк этган Димпл Кападиа унинг ёнига қайтди.

Актриса эрининг ёнидан жилмай, парвариш қилар ва шифокорлар билан маслаҳатлашар эди. Бу йиллар давомида йиғилиб қолган хафагарчиликлардан устун келган инсонийлик эди.

2012 йил 18 июль куни Мумбай шаҳрида Ражеш Кханна 69 ёшида ҳаётдан кўз юмди. Унинг ёнида қизлари ва Димпл бор эди. 19 июль куни Мумбай кўчалари одамларга тўлиб кетди. Юз минглаб мухлислар севимли юлдузини сўнгги манзилга кузатиш учун йиғилишди. Кўпчилик йиғлади. Кўпчилик гуллар олиб келди. Яна кўпчилик эса ёшлиги, муҳаббати ва хотиралари билан хайрлашди.

Димпл Кападия сукут сақлаб турарди. Унинг кўзларида 39 йиллик умумий ҳаётнинг барча хотиралари мужассам эди: муҳаббат, бахт, рашк, хафагарчилик, айрилиқ ва кечирим... Балки уларнинг никоҳи муваффақиятли бўлмагандир. Аммо ҳаётнинг энг муҳим имтиҳонида – инсон оғир дард билан курашаётган паллада – Димпл уни ёлғиз қолдирмади.
Шунинг учун ҳам Ражеш Кханна ва Димпл Кападия ҳақидаги ҳикоя оддий оилавий можаро эмас. Бу шон-шараф ва муҳаббатнинг баҳоси, вақтнинг шафқатсизлиги ва кечиришнинг буюк қудрати ҳақидаги таъсирчан ҳаёт достонидир.

Акбар Фатҳуллаев