22 июнга ўтар кечаси Қўшма Штатлар Эроннинг учта – Фордо, Натанз ва Исфахондаги ядровий объектларига зарба берди.

Пентагон раҳбари Пит Хегсет Эрон ядровий иншоотларига зарба бериш тафсилотларини ошкор қилди ва ўтказилган ҳарбий амалиётнинг диаграммасини кўрсатди.

Эрон ҳудудидаги ядровий иншоотларни йўқ қилиш операцияси «Ярим тун болғаси» деб номланган.

Пентагон раҳбари тақдим қилган маълумотларга кўра, АҚШ ҳарбий-ҳаво кучларининг B-2A Spirit бомбардимончи самолётлари Миссури штатидаги Уайтмен ҳарбий базасидан ҳавога кўтарилиб, қирувчи ва танкер самолётлари ҳамроҳлигида Европа ва Яқин Шарқ бўйлаб шарққа учиб кетган.

Хегсетнинг сўзларига кўра, бу 2001 йилдан буён кузатилган энг узун миссия бўлган ва бундан ташқари, АҚШ ҳарбий-ҳаво кучлари биринчи марта GBU-57 бункер тешувчи бомбасидан фойдаланган.

Ўз навбатида, штаб бошлиқлари қўшма қўмитаси раиси генерал Ден Кейн мазкур амалиётга ёқилғи қуйиш ва ҳимояловчи-қирувчи самолётлар билан биргаликда жами 125 дан ортиқ самолёт жалб қилинганини маълум қилди.

Операция давомида АҚШ ҳарбийлари тахминан 75 та аниқ бошқариладиган ўқ-дорилардан фойдаланган.

Фордо объектига ҳар бирининг оғирлиги 13 тоннадан ортиқ бўлган 12-14 та GBU 57 ҳаводан учириладиган бункер тешувчи бомбалари ташланган. Натанз ва Исфахонга эса 30 га яқин сув ости кемасидан учирилган Tomahawk ракеталари ишлатилган.

«Эроннинг учта ядровий объектига ҳаво зарбасини бериш учун генерал Эрик Курилла қўмондонлиги остида АҚШ Марказий қўмондонлиги «Ярим тун болғаси» операциясини амалга оширди. Бунда мураккаб тактикалар – алдамчи маневрлар, қирувчи самолётлар ҳимояси ва ҳавода ёнилғи қуйиш кабилар қўлланилди.

Бу АҚШ армияси томонидан амалга оширилган мураккаб ва хавф эҳтимоли юқори бўлган миссия эди», - деди Кейн.

Унинг сўзларига кўра, бу фақат бир неча киши биладиган «юқори даражадаги миссия» бўлган.