Россия президенти Владимир Путиннинг ўтган ҳафта АҚШнинг Аляска штатига ташрифи чоғи ўнғайсиз ҳолат юзага келган. Россия президенти маъмурияти ходимлари Путиннинг самолётига ёнилғи қуйгач, жорий санкциялар сабаб тўловни нақд пулда амалга оширишга мажбур бўлган.

Бу ҳақда АҚШ давлат котиби Марко Рубио NBC телеканалига берган интервьюсида маълум қилган.

“Россияликлар Аляскага келгач, уларнинг самолётига ёнилғи қуйиш зарурати туғилди. Улар самолёт ёнилғиси ҳақини нақд пул шаклида тўлашга мажбур бўлишди. Чунки (санкциялар туфайли) улар бизнинг банк тизимимиздан фойдалана олишмайди. Улар (санкцияларнинг) оқибатлари билан ҳар куни юзма-юз келишмоқда”, – деган АҚШ давлат котиби.

Аляска штати Анкориж шаҳридаги авиабазага Россиядан Путиннинг самолётидан ташқари яна бир неча самолёт келган. Мазкур учоқлар Россия расмий делегацияси вакиллари, журналистлар ҳамда Путиннинг автомобилларини келтирган.

Германиянинг Bild нашри ёзишича, биргина президент учоғи ёнилғи баки сиғими 152620 литрни ташкил этади. Демак, Россия делегацияси биргина давлат раҳбари самолётига ёнилғи қуйиш учун ўртача 85 минг доллар нақд пул тўлаган.

Россия Украинага қарши агрессив уруш бошлаган 2022 йилнинг 24 февралидан кейин АҚШ ва Европа Иттифоқи томонидан Москвага нисбатан кенг кўламли санкциялар жорий этилди. Жумладан, Россия халқаро молиявий тўлов тизимларидан узиб қўйилди.

Россия расмий учоқларига ёнилғи қуйишда муаммо юзага келиши биринчи марта кузатилаётгани йўқ. Аввалроқ Россия ташқи ишлар вазири Сергей Лавров санкциялар туфайли ЖАР, Бразилия каби давлатлар расмий самолётга ёнилғи қуйишдан бош тортганини маълум қилганди. “Ёнилғи қуя олмаганмиз. Албатта, бундай ҳолат одамнинг жаҳлини чиқаради”, – деб ёзғирганди С.Лавров.

2025 йил 20 январда расман лавозимга киришган АҚШ президенти Доналд Трамп агар Путин Украинадаги урушни тўхтатмаса қақшатқич санкциялар жорий этиши ҳақида бир неча бор пўписа қилган, ультиматумлар қўйган. Аммо Оқ уйнинг амалдаги хўжайини Кремлдаги ҳамкасбига ён беришни афзал кўрмоқда, дейди таҳлилчилар.

Жумладан, АҚШ ва Россия президентларининг 15 август куни Аляска штатида бўлиб ўтган учрашувида ҳам Путин Трампни доғда қолдиргани айтилмоқда.