Қирғизистоннинг Боткен вилоятида жойлашган «Қадамжой-автойўл» ва «Чашма-автойўл» чегара ўтказиш пунктларида ўтказилган махсус операция давомида коррупцияга алоқадорликда гумон қилинган 27 нафар шахс ушланди.

Маҳаллий ОАВ маълумотларига кўра, 5 июл куни кечқурун Қирғизистон Давлат миллий хавфсизлик қўмитаси (ДМХҚ)нинг Боткен вилояти бошқармаси ходимлари ҳамда «Алфа» махсус бўлинмаси чегара хизмати, божхона ва ветеринария хизмати ходимларини қўлга олган.

Манбаларнинг билдиришича, операция вақтида «Қадамжай-автойўл» ўтказиш пунктида навбатчилик қилаётган ҳарбий тўрт марта ўқ узган. Шунингдек, яна бир ҳарбий хизматчи ҳавога огоҳлантирувчи ўқ узгани айтилмоқда. Ҳозирда қурол ишлатиш ҳолати ва унинг қонунийлиги ўрганилмоқда.

Тинтувлар давомида чегара хизмати ходимларидан 38,5 минг қирғиз соми, 5 миллион 484 минг ўзбек сўми, шунингдек хизмат автомобилидан яна 200 минг ўзбек сўми топилган. Божхона ходимларидан эса 100 минг сом ва АҚШ долларидаги нақд маблағлар мусодара қилинган. Уларнинг аниқ миқдорига ойдинлик киритилмоқда.

Шунингдек, «Чашма-автойўл» ўтказиш пунктининг икки нафар ходими видеокузатув камераларида ноқонуний равишда пул олгани акс этгани айтилмоқда.

Жами 27 нафар ҳарбий хизматчи ва масъул ходим тергов учун Давлат миллий хавфсизлик қўмитасига олиб кетилган. Шунингдек, икки дона АК-74 автомати, икки ўқдон ва 60 дона ўқ-дори мусодара қилинган.

Тергов ҳаракатлари вақтида икки ўтказиш пункти фаолияти вақтинча тўхтатилган. Бу эса чегарада тахминан 3 минг нафар йўловчи ва 400 та автомобил тўпланишига сабаб бўлган. Кейинчалик «Қадамжой-автойўл» ўтказиш пункти орқали ҳаракат қайта тикланган.

Айни пайтда Қирғизистон Давлат миллий хавфсизлик қўмитаси ушбу махсус операция юзасидан расмий изоҳ бермаган.