АҚШ президенти Дональд Трамп 21 ноябрда Венесуэла раҳбари Николас Мадуро билан телефон орқали мулоқотда унга мамлакатни тарк этиш учун бир ҳафта муҳлат берган, деб хабар берди Reuters тўртта манбага таяниб.

Манбаларга кўра, Трамп Мадурога ўзи хоҳлаган давлатга, оила аъзолари билан бирга кетиши мумкинлигини билдирган. Бу муддат 28 ноябрда, жума куни якунига етган. Муддат тугаганидан сўнг Трамп ўз ижтимоий тармоқларида Венесуэла ҳаво ҳудуди АҚШ учун ёпилганини эълон қилди.

Reuters манбалари таъкидлашича, Николас Мадуро мамлакатни тарк этишга рози бўлган, аммо бир қатор шартлар билан. У АҚШдан ўзи ва оиласи учун тўлиқ юридик амнистия, барча АҚШ санкцияларини бекор қилиш ва халқаро жиноят судидаги ишни тўхтатиш каби кафолатларни талаб қилган.

Трамп маъмурияти бу шартларга рози бўлмагани айтилмоқда.

Трампнинг иккинчи президентлик муддати давомида АҚШ ва Венесуэла муносабатлари янада ёмонлашган. Вашингтон Мадурони легитим президент сифатида тан олмайди ва унинг ҳукуматини ўта заиф наркотрафикка қарши кураш, коррупция ва қонунбузарликларда айблайди.

Сентябрдан буён АҚШ Кариб ҳавзасига замонавий авиаташувчи, эсминец ва қирувчи самолётлар жойлаштирди ва наркотик ташувчи деб айтилаётган кемаларга 20 дан ортиқ зарбалар берган.

Ушбу операциялар натижасида 80 дан ортиқ киши ҳалок бўлгани хабар қилинган.

Янги чеклов – ҳаво ҳудудини ёпиш Вашингтоннинг Каракасга босими янада кучайганини англатади. Муттахассислар бу вазият Венесуэладаги сиёсий инқирозни янада чуқурлаштириши, минтақада хавфсизлик муаммоларини кучайтириши мумкинлигини қайд этмоқда.