Украина босқини бошланганидан буён ўтган икки ярим йил муддат ичида жанг майдонида Россиянинг 120 минг нафар ҳарбий хизматчиси ҳалок бўлди, дея хабар берди «Медуза».

«Медуза» нашри Россия мерос реестри ва жамоат ҳукмига ҳавола қилинган таъзия хатларига таянган ҳолда ҳалок бўлган аскарларни ҳисоблашнинг махсус услубини ишлаб чиққан.  

Ушбу ҳисоб-китобга кўра, Россия армияси Украина урушида ҳар куни 200-250 аскаридан айрилмоқда.

Фаол жанговар ҳаракатлар шароитида, томонлар маълумотларни ошкор этмаётган муҳитда урушда қанча аскар ҳалок бўлганини аниқ кўрсатиш қийин. Москва ҳам, Киев ҳам ўз йўқотишлари тўғрисида оз рақамларни келтирмоқда. Аммо бу борада учинчи томон расмийлари ва оммавий ахборот воситалари турли рақамларни айтиб келади.

Аввалроқ Германия канцлери Олаф Шольц президент Путиннинг империячилик васвасаси сабаб Россия ҳар ойда 24 минг аскар қурбон бераётгани ҳақида гапирганди.

2024 йил апрель ойида Буюк Британия мудофаа вазирлиги Россиянинг эҳтимолий йўқотишларини 450 минг деб баҳолаган.

АҚШ Марказий разведка бошқармаси раҳбари Уильям Бёрнс жорий йил январь ойида Украина урушида 315 минг рус аскари ҳалок бўлгани ҳақида баёнот берган.

«The New York Times» газетаси 2023 йил август ойида ёзишича, қирғинбаротда Россия томонидан 120 минг киши ҳалок бўлган ва 170-180 минг киши яраланган. Украина эса 70 минг нафаргача аскарини йўқотган, 100-120 минг киши жароҳатланган.

2024 йил февраль ойида президент Владимир Зеленский урушда 31 минг украин аскари ҳалок бўлганини айтган.