Шри-Ланка собиқ президенти Ранил Викрамасингҳе ҳибсга олинди, деб хабар берди Associated Press.

Мамлакатнинг собиқ раҳбари давлат пулини совуришда гумон қилинмоқда — унга президентлик даврида хорижга чиқиш билан боғлиқ учта айблов қўйилган, дейилади полиция баёнотида.

ОАВ маълумотларига кўра, 76 ёшли собиқ президент хорижга 23 марта сафар қилган, бунинг учун 600 миллион рупийдан ортиқ ёки тахминан 2 млн доллар харажат қилинган.

Викрамасингҳега қўйилаётган асосий айбловлардан бири унинг 2023 йилда Кубадаги G77 саммитидан қайтишда Буюк Британияда тўхтаб ўтгани билан боғлиқ. Ўшанда у рафиқаси билан Вулверҳэмптон университетидаги маросимда қатнашган. Шри-Ланка полициясининг таъкидлашича, бу давлат маблағлари эвазига уюштирилган шахсий ташриф бўлган. Викрамасингҳе айбловларни рад этмоқда.

Ранил Викрамасингҳе иқтисодий инқироз ва халқ исёни туфайли мамлакатдан қочиб кетган Готабая Ражапаксанинг ўрнига 2022–2024 йилларда Шри-Ланка президенти бўлган. Собиқ давлат раҳбари ҳибсга олиниши Шри-Ланка тарихида биринчи марта юз бермоқда.