АҚШ президенти Дональд Трамп Атлантика океани номини ўзининг ёки Америка номи билан алмаштириш таклифини Google компанияси рад этганини маълум қилди. Бу ҳақда The Guardian хабар берди.

Трамп Жанубий Каролинадаги митингда Google бош директори Сундар Пичайга қўнғироқ қилиб, Атлантика океанининг номини ўзгартириш имкониятини муҳокама қилганини айтди.

«Менга фақат иккита океан ёқади: Атлантика ва Тинч океанлари. Бошқа океанларга Трамп ёки Америка номини бермоқчи эмасман. Шунинг учун Атлантика океани масаласини жиддий кўриб чиқдик», – деди у.

Президентнинг сўзларига кўра, Google раҳбари бу таклифни рад этган.

«Йўқ, йўқ. Бу сафар бундай қилмайман. Океанлар бошқа масала, жаноб президент. Улар жуда кўп мамлакатлар қирғоқларини ювиб туради. Илтимос, биздан буни сўраманг», – деган Пичай.

Шундан сўнг АҚШ президенти океаннинг амалдаги номини сақлаб қолишга мойил эканини билдирди.

Эслатиб ўтамиз, Трамп аввалроқ Мексика қўлтиғи номини «Америка қўлтиғи» деб ўзгартириш тўғрисида фармон имзолаган. Google Maps АҚШ фойдаланувчилари учун ушбу янги номни қўллай бошлаган.

Шунингдек, Трамп Онтарио кўлини «Америка кўли», Ҳурмуз бўғозини эса «Трамп бўғози» деб номлаш ғояларини ҳам илгари сурган.