АҚШнинг амалдаги президенти Доналд Трамп Вашингтондаги зўравонликларга жавобгарлар жазосини олишига ҳамда ҳукуматни тинч йўл билан Жо Байденга топширишга ваъда берди.

Ушбу баёнот унинг Twitter саҳифасида видеомурожаат кўринишида жойланди.

Видеомурожаатда Трамп ваколатининг қолган муддатини ҳукуматни Жо Байденга «бир маромда ва оғриқсиз топширилиши»ни таъминлашга бағишлашини айтди. Маълумот учун: Жо Байден 20 январдан ўз ваколатларини бажаришга киришади.

Трамп ҳозир энг муҳими тинчланиш эканини таъкидлаган ҳолда америкаликларни муросага чорлади. Ҳаётидаги энг муҳим давр — АҚШ президентлиги бўлганини қўшимча қилган Трамп «арқонни узун ташлаб қўйганини» ҳам эслатишни унутмади:

«Менинг ажойиб тарафдорларим, биламан, ҳафсалангиз пир бўлган, аммо шуни ҳам билиб қўйингки, бизнинг муҳташам кампаниямиз энди бошланмоқда».

АҚШда президентлик сайловларининг кейингиси 2024 йилда ўтказилади, ўшанда Доналд Трамп, худди ҳозирги Жо Байден сингари, 78 ёшда бўлади.