2023 йил бошида Россия ва Украина ўртасидаги урушни тўхтатиш бўйича норасмий воситачилар томонидан тинчлик режаси ишлаб чиқилган. Россия президенти Владимир Путин ушбу таклифнинг айрим шартларини муҳокама қилишга розилик билдиргани, бироқ Украина раҳбарияти ҳудудий ён беришларни қабул қилмагани айтилмоқда.

Бу ҳақда Британиянинг Financial Times нашри музокараларда иштирок этган шахсларга таяниб хабар берди.

Нашр маълумотларига кўра, 2023 йил бошида ишлаб чиқилган режа Россия қўшинларини 2022 йил 24 февралгача назорат қилинган ҳудудларга қайтаришни назарда тутган. Бунинг эвазига Украина НАТОга аъзо бўлишдан воз кечиши, Қрим устидан Россия назоратини тан олиши ва яриморолга қуруқлик орқали эркин ўтиш имкониятини таъминлаши керак эди.

Музокаралар расмий дипломатик каналлар орқали эмас, балки воситачилар иштирокида олиб борилган. Улар орасида америкалик Ричард Конн ва Боб Форесман, Путиннинг яқин таниши Маттиас Варниг ҳамда украиналик продюсер Александр Роднянский бўлган.

Варнигнинг сўзларига кўра, Путин таклиф этилган келишув лойиҳасини батафсил ўрганиб чиққан ва қўшинларни ажратиш чизиғи бўйича таклифни маъқуллаган. Шунингдек, у Украинанинг Европа Иттифоқига қўшилишига қарши эмаслигини билдирган ва НАТОга аъзоликдан ташқари хавфсизлик кафолатларини муҳокама қилиш имкониятини қолдирган.

Бироқ Роднянскийнинг айтишича, Украина президенти Владимир Зеленский ва унинг офиси раҳбари Андрей Ермак ҳудудий ён беришларни муҳокама қилишни рад этган. Ўша пайтда Киев раҳбарияти жанг майдонида яхшироқ натижаларга эришиш мумкин, деб ҳисоблаган.

Воситачилар 2023 йил 24 февралга қадар келишувга эришишни режалаштирган, аммо музокаралар натижасиз якунланган.

Financial Times ёзишича, норасмий мулоқот канали Вашингтон томонидан расман қўллаб-қувватланмаган. Шу билан бирга, АҚШнинг собиқ расмийлари Путиннинг мазкур таклифга муносабати ва воситачилар фаолияти самарадорлигига шубҳа билдирган.

Нашр суҳбатлашган айрим воситачилар АҚШ ва Украина ўша пайтда Киев учун ҳозирги эҳтимолий шартларга нисбатан қулайроқ бўлган тинчлик келишувига эришиш имкониятини қўлдан бой берган, деб ҳисоблайди.