Украина етакчиси Владимир Зеленский Туркияда Россия президенти Владимир Путин билан музокаралар ўтказишга тайёрлигини эълон қилди.

​CNN Turk телеканалига берган интервьюсида у Туркия президенти Ражаб Тоййиб Эрдўғон бундай учрашувни ташкил этишга ёрдам беришига умид билдирди. Зеленский юқори даражадаги музокаралар «муҳим», деб ҳисоблайди, чунки бошқа алоқалар ҳали урушга чек қўймаган.

​«Биз Туркиядаги ушбу учрашувга тайёрмиз. Президент Эрдўғоннинг Путин билан ўз алоқалари борлигини биламан. Шунинг учун биз Туркиядаги учрашувни қўллаб-қувватлаймиз», деди Зеленский. Унинг фикрича, икки мамлакат раҳбарлари делегациялар ва техник гуруҳлар ҳал қила олмайдиган масалалар бўйича келишувга эриша оладилар.«Шунинг учун мен у билан қарор қабул қилувчи сифатида учрашмоқчиман», деб таъкидлади Зеленский.

​У Путин билан мумкин бўлган музокараларнинг асосий мавзуси сифатида фронт чизиғида сулҳга эришиш ва унинг амалга оширилишини назорат қилиш механизмини яратишни айтди. Зеленский шунингдек, хавфсизлик кафолатлари, Украинани тиклаш ва ҳудудий масалалар раҳбарият даражасида муҳокама қилиниши керак, деб ҳисоблайди. Шу билан бирга, у Путиннинг талабларига, яъни Донбассни топшириш ва Қримни Россия ҳудуди сифатида тан олишга бўйсунишни ният қилмаслигини таъкидлади, чунки бу Украина Конституциясига зиддир.

​«Ҳудудий масала жуда нозик. Биринчи навбатда, биз халқ ҳақида ўйлашимиз ва уларнинг муаммоларини ҳал қилишимиз керак. Биз бундан буён қандай яшашимиз ва қандай хавфсизлик кафолатлари берилишини раҳбарият даражасида муҳокама қилишимиз керак. Энг муҳими, урушни қандай тўхтатиш ва унинг қайта бошланишига йўл қўймаслик керак», деди Зеленский.

​Президентнинг қўшимча қилишича, Киев ноябрь ойининг биринчи ярмида Абу-Дабида Украина, Россия ва АҚШ техник делегациялари ўртасида уч томонлама музокараларга умид қилмоқда. Уларнинг кун тартиби энергетика ва денгиз соҳаларида сулҳ тузиш, шунингдек, асирлар алмашинувини ўз ичига олиши мумкин. Зеленскийнинг сўзларига кўра, бу учрашувлар етакчилар саммитига тайёргарлик кўришга ёрдам бериши керак.

​Аввалроқ Россия президентининг ёрдамчиси Юрий Ушаков Путин Зеленский билан шахсан боғланишга қарор қилса, унинг қўнғироғига жавоб беришини айтган эди. Шунингдек, у Украина президенти музокаралар учун Москвага бориши мумкинлигини ва у ерда унинг хавфсизлиги таъминланишини яна бир бор таъкидлади.