Prezident Shavkat Mirziyoyev «O‘zbekiston Respublikasida madaniyat va san’at sohasini innovatsion rivojlantirish chora-tadbirlari to‘g‘risida»gi qarorida ikki oy muddatda «Metsenatlik faoliyati va madaniy homiylik to‘g‘risida»gi O‘zbekiston Respublikasi Qonuni loyihasini ishlab chiqishni topshirdi.

Qonun loyihasida boshqalar qatorida quyidagilar nazarda tutiladi:

— madaniyat va san’at muassasalariga, shu jumladan, jismoniy shaxslarga yordam ko‘rsatuvchi metsenatlar va homiylarga soliq imtiyozlari (chegirmalar) taqdim etish uchun huquqiy asoslar yaratish;

— soliq imtiyozlari (chegirmalar) olish huquqini saqlab qolgan holda madaniyat va san’at muassasalarini qo‘llab-quvvatlash shakllarini va uslublarini kengaytirish (muayyan ishlarni bajarish, xizmatlar ko‘rsatish, mol-mulk huquqini berish va hokazo);

— madaniyat va san’at muassasalarini jamoatchilik tomonidan qo‘llab-quvvatlashning zamonaviy uslublarini joriy etish;

— metsenatlik va homiylik yordamini olayotganlarning hisob berish tizimini, shuningdek, ulardan maqsadli foydalanilishi ustidan nazoratni takomillashtirish.

Metsenat — ilm-fan va san’at sohasini rivojlantirish uchun beg‘araz va ko‘ngilli tarzda moddiy yordam ajratadigan shaxs.