Тушунарсиз суд қарори... Балки юридик билим йўқлигимикан?

Содда ва лўнда тушунтиришга уринаман.

Тасаввур қилинг: Сизнинг ҳовлингизга кимдир кирди. Сўрамасдан, албатта. Бемалол, катта холасининг уйига киргандек, айланиб, орқа ҳовлидаги мол-қўйларингизни расмга ҳам олди.

Сиз ҳайрон: «Ким бу? Қаердансан?» дейсизми? Ҳалиги одам сизни менсимагач, енгиллик қилсангиз қулоқ-чаккасига тортворасиз. Оғирлик қилган тақдирингизда ҳам сўкинворишингиз табиий. Ахир сизнинг хонадонингиз, ҳовлида аҳли аёлингиз бўлиши мумкин.

Хуллас, можаро чиқиб, даҳанаки жанжал бўлди. Воқеа жойига келган ИИБ профилактика инспектори нима қилади — ишни судга оширади-да.

Хўп. Судья кимни айбдор қилиши мумкин? Ҳовлига ўғринча кирганними ёки уй эгасигами?

Фикрларингизни кейин билдирарсиз.

Риштондаги маъмурий суд ҳовлига бостириб кирганга 1 «минималка», уни сўкиб берган уй эгасига 2 «минималка» жарима жазоси қўлланилади?!

Судда томонлар (ўзбекчилик, мусулмончилик деб) бир-бирини кечириб, адовати йўқлиги айтади. Шунга қарамай жазо берилди. Мен эса жазодаги адолатни тушунмай ҳалакман.

Дейлик, мен сизнинг ҳовлингизга рухсатсиз, бемалол кириб, журналистман деб, мол-қўйдан ташқари синглингиз, опангиз, хотинингизни расмга олдим... Сиз бунинг учун мени ҳақоратлашингиз табиий. (Мен билган қоидага кўра афт-башарамни бежаб қўйишгаям ҳаққингиз бор.) Суд эса мендан кўра Сизга кўпроқ жазо берса?!

Тасаввурга сиғадими бу?!

Э, бўлиши мумкинмас, деманг. Суд қарорини илова қиляпман, ишонмасангиз (ва эринмасангиз) — кўринг, ўқинг...

Баҳодир Элибоев
(муаллифнинг «Фейсбук»даги саҳифасидан олинди)