Жиззах вилояти Ички ишлар бошқармаси томонидан ўтказилган тезкор-қидирув тадбирлари давомида телеграм орқали ахлоқсиз ва болалар иштирокидаги порнографик маҳсулотларни тарқатиб келган шахс фош этилди. Аниқланишича, 442 нафар обуначига эга бўлган саҳифа орқали 403 та болалар порнографик материаллари тарқатилган.

Гумонланувчи ўз кўрсатмасида порнография мавзусидаги видеоларга қизиқиш орқали канал очгани, турли ёш тоифасидаги материалларни жойлаштиргани ва қилган ишидан пушаймон эканини билдирган.

Шунингдек, 2004 йилда Тошкент вилоятида туғилган яна бир шахс телеграмда тўртта аноним аккаунт орқали қизлар номидан олтита канал очгани маълум бўлди. У жами 3 750 та порнографик материал жойлаштириб, банк карталари ва абонент рақамлари орқали каналларни сотиш билан шуғулланган. Тергов маълумотларига кўра, у вояга етмаган шахслар тасвирланган материалларни 837 нафарга сотиб, жами 29,2 миллион сўм ноқонуний даромад топган.

Ушбу шахс ҳам қилган ишидан афсусда эканини билдириб, бу ҳаракат жиноят эканини билмаганини таъкидлаган.

Ҳолатлар юзасидан Ўзбекистон Республикаси Жиноят кодексининг 130-моддаси 3-қисми билан жиноят ишлари қўзғатилиб, гумонланувчиларга нисбатан қамоқ эҳтиёт чораси қўлланилган. Айни пайтда тергов ҳаракатлари давом этмоқда.

Мутахассислар таъкидлашича, болалар порнографияси нафақат қонунбузарлик, балки шахснинг психологик ҳолатидаги жиддий бузилишларни кўрсатувчи хавфли сигналдир. Бундай ҳолатлар импульсларни назорат қилишдаги муаммолар, эмпатиянинг пастлиги ва ахлоқий чегараларга бефарқлик билан боғлиқ бўлиши мумкин. Шу боис, бу каби жиноятларнинг олдини олишда нафақат ҳуқуқий, балки психологик профилактика чоралари ҳам муҳим аҳамият касб этади.

Ҳуқуқни муҳофаза қилувчи органлар интернет орқали ёшлар онгига зарар етказувчи ва жамият келажагига таҳдид солувчи разил ғояларни тарқатишга уринаётган шахслар ва жиноий гуруҳларга қарши кескин курашни давом эттиришини маълум қилди.