Гамбург (Германия)даги вакцинация маркази шифокори оғир касалликка чалинган хотинини эмлаш учун вакцина ўғирлади — унинг аёли вакцинация қилинаётган аҳоли тоифасига киритилмаганди.

Шифокор вакцина тўлдирилган шприцни яширинча чўнтагида олиб чиққан.

«Bild» нашри тарқатган ушбу хабарни шаҳар соғлиқни сақлаш департаменти тасдиқлади: чиндан ҳам январь ойининг ўрталарида 69 ёшли эркак (шифокор) шприцни вакцинага тўлдириб чиқиб, вакцинация маркази кириш қисмида кутиб турган рафиқасини эмлаган.

Қоидабузарлик ўша заҳоти фош этилган, шифокорни эртасигаёқ ишдан ҳайдашган. Унга нисбатан жиноий иш қўзғалган, дейилади хабарда.

Шифокорнинг хотинини эса вакцинанинг иккинчи дозаси билан эмлашди.

«Биринчи эмлаш қилинган бўлса, иккинчиси ҳам шарт. Акс ҳолда вакцина беҳуда совурилгани қолади. Агарда иккинчи эмлаш бажарилмаса вирус мутацияси эҳтимоли кучаяди, бу одамнинг ўзи хавфли тарқатувчига айланиши мумкин», — деди департмент вакили Мартин Ҳелфрих.

Ҳелфрих қўшимча қилишича, хавфсизлик чоралари кучайтирилгани боис кўп миқдордаги вакцинани ўғирлаш имконсиз. Махсус қўриқланадиган омбордан аввалига вакцинанинг биринчи дозаси келтирилади. Қолаверса, уни ўта паст ҳароратда сақлаш талаб этилиши ҳам ўғрилар учун муаммо туғдириши аниқ. «Вакцина шунчаки шприцда чўнтакка солиб олиб чиқиб кетиладиган нарса эмас», — таъкидлади у.